Nafta zgjeron fitimet – Për shkak të tensioneve të ndalimit të furnizimit me gaz nga Rusia dhe zhvillimet në Kinë
Çmimet e naftës zgjeruan fitimet të mërkurën mes tensioneve gjeopolitike të shtuara pasi Rusia ndërpreu furnizimet me gaz për Bullgarinë dhe Poloninë, ndërsa shpresat për stimul ekonomik në Kinë nxitën perspektivën e kërkesës.
Kontratat e së ardhmes së naftës së papërpunuar Brent në Londër u rritën me 67 cent, ose 0.6%, në 105.66 dollarë për fuçi, ndërsa nafta e papërpunuar e Teksasit Perëndimor fitoi 44 cent, në 102.14 dollarë për fuçi.
Çmimet e naftës së papërpunuar ishin rreth 3% më të larta krahasuar me një ditë më parë pasi tregu është i paqendrueshëm midis shqetësimeve të ofertës dhe kërkesës për ndërprerjen e naftës dhe gazit rus dhe një përkeqësimi të perspektivës ekonomike globale.
Gjigandi energjetik rus, Gazprom ndërpreu të mërkurën furnizimet me gaz për Bullgarinë dhe Poloninë pasi dy vendet nuk paguan gazin në rubla, përgjigja më e ashpër e Kremlinit deri më tani ndaj sanksioneve të vendosura nga Perëndimi për konfliktin në Ukrainë.
Sipas analistëve, reduktimi i furnizimit me gaz nuk është një lajm i ri, por po rrit shqetësimet për stagflacion. Fondi Monetar Ndërkombëtar paralajmëroi se Azia përballet me një perspektivë “stagflacioniste” për shkak të luftës në Ukrainë, një rritje të kostove të mallrave dhe ngadalësim në Kinë duke krijuar pasiguri të konsiderueshme.
Banka qendrore e Kinës deklaroi një ditë më parë se do të rrisë mbështetjen e politikës monetare për ekonominë e saj, ndërsa Pekini po përpiqet për të frenuar një shpërthim të ri të COVID-19 dhe për të shmangur të njëjtin izolim si në Shangai. Çdo stimul do të rriste kërkesën për naftë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.