Nafta zgjeron humbjet – Brenti i Londrës, në nivelin më të ulët që nga gushti

Çmimet e naftës kanë vijuar tendencën në rënie edhe gjatë sesionit të sotëm, me naftën Brent që po tregtohet në rreth 76 dollarë për fuçi, niveli më i ulët që nga gushti i këtij viti. Çmimet po gjenden nën presion për shkak të shqetësimeve se kërkesa po dobësohet.

Por, në anën tjetër, humbjet po kufizohen nga sanksionet amerikane ndaj naftës iraniane.

Në një shenjë se furnizimi i tregut është i mjaftueshëm, Instituti Amerikan i Naftës deklaroi se rezervat në SHBA u rritën me 9.9 milionë fuçi, gjatë javës së kaluar, shumë më tepër se parashikimet e analistëve.

Megjithatë, investitorët po presin të dhënat zyrtare që do të publikohen më vonë gjatë ditës nga qeveria amerikane. Nafta Brent e Londrës po tregtohet në rreth 76.3 dollarë për fuçi, ndërsa nafta Bruto amerikane po tregtohet në rreth 66.4 dollarë për fuçi.

Në sesionin e kaluar, çmimet e naftës ranë ndjeshëm, me Brentin e Londrës që humbi 4.3% të vlerës. Shitja masive që karakterizoi tregun e aksioneve u zhvendos edhe në tregun e naftës, për shkak të shqetësimeve që kanë të bëjnë me ecurinë e ekonomisë globale.

Agjencia Ndërkombëtare e Energjisë uli parashikimin për kërkesën globale për naftë, gjatë vitit 2019, për shkak të ngadalësimit të ekonomisë.

Analistët mendojnë se, gjatë vitit të ardhshëm çmimet mund të gjenden nën presion edhe për shkak të pritshmërive për rritjen e prodhimit të naftës argjilore në SHBA.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.