Nafta zgjeron humbjet – Çmimet fillojnë korrektimin në kahun e poshtëm
Çmimet e naftës kanë zgjeruar humbjet gjatë sesionit të sotëm, por megjithatë, nafta Brent vijon të tregtohet pranë 70 dollarëve për fuçi, që është niveli më i lartë që nga dhjetori i vitit 2014. Megjithatë humbjet vijojnë të kufizohen nga marrëveshja e OPEC dhe Rusisë për të ulur prodhimin me 1.8 milionë fuçi, deri në fund të këtij viti.
Nafta Brent e Londrës po tregtohet në rreth 69.3 dollarë për fuçi, ndërsa nafta Bruto amerikane po tregtohet në rreth 63.8 dollarë për fuçi.
Analistët kanë përditësuar të dhënat mbi raportin kërkesë-ofertë, për shkak të uljes së prodhimit dhe rritjes së kërkesës. Për këtë arsye, analistët parashikojnë një deficit prej 430 mijë fuçi në ditë, gjatë këtij viti, krahasuar me 100 mijë fuçi në ditë, që ishte vlerësimi i mëparshëm.
Gjithashtu, parashikohet që nafta Brent të ketë një çmim mesatar prej 64 dollarë për fuçi, gjatë 2018, nga 56 dollarë që ishte vlerësimi i mëparshëm. Ndërsa për naftën Bruto amerikane parashikohet një çmim mesatar prej 60 dollarë për fuçi.
Morgan Stanley deklaroi se, gjatë vitit 2017 teprica në treg ishte rreth 500 mijë fuçi në ditë. Gjithsesi, analistët vijojnë të paralajmërojnë se, rritja e çmimeve me rreth 15% që nga fillimi i dhjetorit, mund të përballet me një korrektim në rënie.
Çmimet e naftës janë mbështetur, gjithashtu, nga dobësimi i dollarit amerikan në raport me euron, që ka prekur nivelin më të ulët në 3 vitet e fundit, përballë shportës me monedhat ndërkombëtare. Por, një faktor që mund të kufizojë rritjen e çmimeve mund të jetë rritja e prodhimit të naftës argjilore në Shtetet e Bashkuara të Amerikës, mbi 10 milionë fuçi në ditë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.