Nafta zgjeron humbjet – Ndikon OPEC dhe rritja e rezervave në SHBA
Çmimet e naftës po qëndrojnë në rënie edhe në sesionin e sotëm, për shkak të pritshmërive se, vendet anëtare të OPEC do të rrisin prodhimin për të larguar shqetësimet që kanë të bëjnë me uljen e furnizimit nga Irani dhe Venezuela. Gjithashtu, edhe rritja surprizë e rezervave të naftës në SHBA po ushtron presion mbi çmimet dhe njëkohësisht ka zgjeruar diferencën mes dy bençmarkëve kryesorë në nivelin më të lartë në 3 vitet e fundit.
Nafta Brent e Londrës po tregtohet në rreth 79.4 dollarë për fuçi, ndërsa nafta Bruto amerikane po tregtohet në rreth 71.5 dollarë për fuçi. Organizata e Vendeve Eksportuese të Naftës, OPEC, mund të vendosë rritjen e prodhimit, për shkak të reduktimit të furnizimit nga Irani dhe Venezuela, si pasojë e sanksioneve të Uashingtonit. Kjo ka qenë arsyeja kryesore që i ka rritur çmimet e naftës në nivelin më të lartë që nga nëntori i vitit 2014.
OPEC dhe vendet e tjera që nuk janë pjesë e organizatës do të takohen në Vjenë më 22 qershor, dhe do të rishikohet marrëveshja për uljen e prodhimit me 1.8 milionë fuçi në ditë. Referuar të dhënave të publikuara nga Administrata për Informimin mbi Energjinë, rezervat e naftës komerciale në SHBA u rritën me 5.8 milionë fuçi, gjatë javës që u mbyll më 18 maj, ndërsa analistët parashikonin një rënie me 1.6 milionë fuçi.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.