Nafta zgjeron rritjen sipër 90 dollarë/fuçi – Stuhia dimërore në SHBA kërcënon ndërprerje të furnizimeve

Nafta është rritur në tregtinë e fundit të javës, duke zgjeruar rritjet e forta të sesionit të kaluar, ndërkohë që moti i ftohtë përfshiu pjesë të mëdha të Shteteve të Bashkuara, duke kërcënuar ndërprerje të furnizimeve të naftës.   Nafta Brent e Londrës u rrit me 0.5% në 91.53 dollarë për fuçi, pasi shtoi 1.16 dollarë në tregtinë e së Enjtes. Nafta bruto amerikane, u rrit me 0.6% në 90.79 dollarë për fuçi, pasi shtoi 2.01 dollarë në sesionin e kaluar. Kontrata amerikane, kaloi nivelin e 90 dollarëve për të parën herë që prej Tetorit 2014.

Të dy kontratat po i drejtohen rritjes së 7 radhazi javore.  Një stuhi gjigante e Dimrit përfshiu qendrën dhe Verilindjen e Shteteve të Bashkuara ditën e Enjte, duke sjellë borë të dendur dhe shkaktuar ngrica, ç’ka e bëri të vështirë apo të pamundur udhëtimin.  Stuhia ndërpreu gjithashtu energjinë për mijëra familje dhe mbylli shkollat në disa shtete.  Ndërkohë që kërkesa po rimëkëmbet me hapa më të shpejtë se oferta, tregjet e naftës janë të cënuara ndaj ndërprerjeve, sipas analistëve.

Tensionet gjeopolitike në Europën Lindore dhe Lindjen e Mesme, kanë shkaktuar gjithashtu rritje të forta të naftës, që kanë rritur çmimet e të dy kontratave me rreth 20% deri më tani për vitin.  SHBA paralajmëroi se Rusia po planifikon të përdorë një sulm të skenuar, si një justifikim për të pushtuar  Ukrainën.  Presidenti rus Vladimir Putin, ka fajësuar NATO dhe perëndimin për rritjen e tensioneve, edhe pasi ka mbledhur mbi 100,000 trupa në kufirin e Ukrainës.

Analistët presin që përballë rreziqeve gjeopolitike dhe rritjes së ngadaltë të prodhimit nga OPEC, çmimet pritet të arrijnë 100 dollarë për fuçi.  Organizata e Vendeve Eksportuese të Naftës, së bashku me aleatë si Rusia, që njihen si OPEC+, ranë dakord më herët gjatë javës se do të ruajnë objektivin e rritjes së prodhimit me 400,000 fuçi në ditë në muajin e ardhshëm. Megjithatë, karteli po has vështirësi për të rritur prodhimin me atë normë, për shkak të problemeve në kapacitet.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.