Ndalet rritja e interesave – Yield-et e bonove bien për herë të parë në 6 muaj
Interesat e bonove të thesarit në tregun primar kanë rënë për herë të parë pas një periudhe gjashtëmujore rritjeje të vazhdueshme. Sipas të dhënave nga Banka e Shqipërisë, bonot me maturim 12-mujor u shitën në ankandin e të martës kësaj jave me një yield mesatar të ponderuar prej 2.18%, nga 2.26% që kishte qenë në ankandin e mëparshëm, të muajit shtator. Frenimi i rritjes së interesave i detyrohet rritjes së likuiditetit të lirë në treg dhe shtimit të kërkesës nga investitorët për të blerë këto instrumente. Në ankandin e djeshëm, kërkesat e paraqitur për blerje kishin vlerën e 11.9 miliardë lekëve, ndjeshëm më shumë në raport me shumën prej 8.7 miliardë lekësh të shpallur për financim nga Ministria e Financave.
Rritja e kërkesës mund të shpjegohet me një zgjerim të likuiditeteve të lira të sistemit bankar gjatë sezonit veror, por edhe me ndryshimin e rregullave për mbajtjen e rezervës së detyrueshme. Deri në fund të muajit gusht, bankave iu ishte lejuar, përkohësisht, që një pjesë të rezervës së detyrueshme në euro ta mbanin në monedhën vendase, duke e konvertuar me kursin zyrtar. Tani bankat duhet ta mbajnë të gjithë rezervën e detyrueshme të denominuar në valutën përkatëse. Ky ndryshim mund të ketë rritur likuiditetin e lirë në monedhën vendase dhe të ketë shtrënguar disi atë në valutë të huaj.
Në analizat e saj, Banka e Shqipërisë shprehej se rritja e interesave të bonove pas tremujorit të dytë u diktua kryesisht nga rritja e kërkesës së qeverisë për financim në tregun e brendshëm pas tremujorit të dytë. Por, ashtu siç parashikohej, cikli i rritjes së interesave pati përmasa të kufizuara dhe kishte kryesisht një natyrë korrektuese, pas rënies së madhe që u verifikua, sidomos duke filluar nga tremujori i fundit i vitit të kaluar. Pas emetimit të eurobondit, në tetor 2018, tregu i brendshëm financiar u gjend edhe më likuid se zakonisht. Kjo rriti konkurrencën mes investitorëve për të blerë bono dhe obligacione, në mungesë të alternativave të tjera të investimit financiar në lekë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.