Ndalohen 100 mijë euro të padeklaruara në doganën e Muriqanit/ Drejtoria e Përgjithshme e Doganave ju bën thirrje qytetarëve!

100 mijë euro të padeklaruara janë ndaluar nga strukturat Doganore në Muriqan të Shkodrës. Në kuadër të forcimit të masave për parandalimin e lëvizjes së vlerave monetare nëpërmjet Pikave te Kalimit Kufitar, strukturat e Degës Doganore Shkodër, në bashkëpunim me Strukturat e Policisë Kufitare, kanë kryer kontrolle ‎për pasagjerët në hyrjet dhe daljet nga vendi, me qëllim parandalimin e trafiqeve dhe lëvizjes së vlerave monetare.

Gjatë kontrolleve të kryera nga strukturat e Degës Doganore të Shkodër në bashkëpunim me strukturat e Policisë, në Pikën e Kalimit Kufitar Muriqan, u konstatua dhe u ‎ndalua shtetasi A.Q. i cili po transportonte një vlerë në valutë të padeklaruar prej 100 mijë eurosh.

Drejtoria e Përgjithshme e Doganave në kuadër të forcimit të masave për parandalimin e trafiqeve, ka intensifikuar ‎kontrollet në pikat e kalimit kufitar, si dhe i bën me dije shtetasve të cilët kalojnë në doganë të deklarojnë vlerat monetare, sendet me vlerë, apo metalet dhe gurët e çmuar, të cilat janë me vlerë më të madhe se 1.000.000 lekë.

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.