Ndaloi prej një viti pagesën me para cash – Pronari: Biznesi ka ecur më mirë se kurrë më parë
Ross Browns ndaloi së pranuari para cash në kafenenë e tij në Londër më shumë se një vit më parë dhe sipas tij që nga ajo kohë, biznesi ka ecur më mirë se kurrë.
“Shumë njerëz paguanin me karta gjithsesi, ne vetëm vendosëm të bëjmë kalimin e plotë”, tha ai për CNBC.
Pronari i kafesë u frymëzua për ndalimin e parasë cash pas një udhëtimi në Suedi, ku ajo përdoret vetëm për 20 për qind të pagesave në dyqane sipas bankës qendrore të vendit. Sipas tij, kjo jo vetëm ka rritur biznesin, por gjithashtu ka sjellë edhe reduktimin e vjedhjeve.
“Browns of Brockley”, renditet midis një numri gjithnjë e më të madh të bizneseve të vogla në Britaninë e Madhe që janë duke hequr pagesën me para cash. Sipas një raporti të fundit të Forex Bonuses, Britania e Madhe është vendi i tretë pas Kanadasë dhe Suedisë që po përpiqet të eliminojë pagesën me para cash.
Tranzicioni drejt pagesave dixhitale dhe me kartë po detyron shumë biznese që zakonisht mbështeten në pagesa me para cash që të përqafojnë teknologjinë e re. Kisha e Anglisë njoftoi gjithashtu se do të fillojë të pranojë pagesa përmes kartës për evente të tilla si dasmat, pagëzimet dhe donacionet me ndihmën e kompanive të Fintech.
Por, jo të gjithë janë të mendimit se Britania është e vendosur të kthehet në një shoqëri që nuk paguan më me para në dorë. Graham Mott, kreu i LINK, tha se 2.7 milionë njerëz në të gjithë vendi ende mbështesin këtë lloj pagese.
“Do të duhet një kohë e gjatë derisa pagesa cash të zhduket”, tha Mott. Të dhënat tregojnë se familjet me të ardhura të ulëta dhe të moshuarit janë disa nga përdoruesit më të shpeshtë të parasë cash.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.