Ndarja e fondeve për bashkitë në 2021 – 213 milion euro transfertë, pjesë edhe nga tatimi mbi të ardhurat personale
Vitin e ardhshëm, 61 bashkitë në vend do të marrin nga buxheti i shtetit në total 26.5 miliardë lekë apo 213 milionë euro në formën e transfertës së pakushtëzuar, e cila kompenson defiçencat në të ardhurat që kanë dhe problematikat në përmbushjen e funksioneve. Referuar draftbuxhetit 2021, nga ky total, 18.2 miliardë lekë janë transfertë e pakushtëzuar e përgjithshme, e cila mbetet në të njëjtat nivele të një viti më parë, pavarësisht se krahasuar me rregullin fiskal 1% e PPB-së në vitin 2021, rezulton të jetë 1.4 miliardë lekë më shumë.
Ndërkaq nga fondi total, 7.8 miliard lekë jepen në fromën e transfertës së pakushtëzuar sektoriale për funksionet e reja, të cilat shkojnë kryesisht për arsimin parashkollor; arsimin parauniversitar; shërbimimin të mbrojtjes nga zjarri; administrimin e pyjeve; ujitjen dhe kullimin, ku për secilin zë fondet kanë pësuar një rritje të lehtë. Ndërkaq, në buxhetin e vitit 2021, do të akordohet për njësitë e vetëqeverisjes vendore si transfertë specifike për emergjencat civile një fond prej 500 milion lekësh i cili shpërndahet me një formulë e cila bazohet në peshën që zë buxheti i çdo bashkie ndaj totalit të buxhetit të të gjitha bashkive.
Nga ana tjetër, për herë të parë, viti e ardhshëm të ardhurat e bashkive nga taksat e ndara, gjithashtu do të rriten me rreth 900 milion lekë, përfshirë këtu shpërndarjen e tatimit mbi të ardhurat personale për njësitë e vetëqeverisjes vendore.
Në buxhetin e vitit 2021, transfertat e pakushtëzuara sektoriale të:
- Arsimit parashkollor janë rritur me 4 përqind;
- Arsimit parauniversitar me 3 përqind;
- Shërbimit të mbrojtjes nga zjarri dhe shpëtimi 6 përqind;
- Administrimit të pyjeve me 10 përqind;
- Ujitjes dhe kullimit janë rritur me 6 përqind.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.