Ndarja e tregut të fluturimeve pas bllokimit – 57% e tregut zotërohet nga Wizz Air dhe Air Albania, 8 kompani pa aktivitet
Numri i pasagjerëve që udhëtuan përmes aeroportit të Rinasit gjatë muajit Prill arriti në 100 606, sipas të dhënave të Autoritetit të Aviacionit Civil, duke shënuar një rritje të ndjeshme në raport me të njëjtin muaj të vitit të kaluar, ku fluturimet ishin të bllokuara si pasojë e COVID-19. Megjithatë, në raport me prillin e vitit 2019, që ishte një vit normal fluturimesh, numri i pasagjerëve regjistron një rënie me 58%.
Ndërkaq, sa i takon ndarjes së tregut të fluturimeve për muajin prill, kompania Wizz Air dominon tregun me 33% të totali, e ndjekur nga kompania Air Albania me 24% të totalit, çka tregon se 57% e tregut zotërohet nga këto 2 kompani. Në vendin e tretë listohet kompania Albawings me 8% të tregut ajror, ndërsa pas saj vjen Austrian Airlines me 7%. Paralelisht, për muajin prill, 8 kompani rezultojnë të mos kenë kryer asnjë fluturim.
Ndërkaq, numri i pasagjerëve që kanë fluturuar me charter u regjistrua në 748, nga 54 udhëtarë që ishte gjatë prillit të 2020-ës. Megjithatë, ngjashëm me fluturimet e kryera nga linjat ajrore, në raport me vitin 2019,ka një rënie të ndjeshme të numrit të këtyre pasagjerëve. Kjo pasi në prill të vitit 2019 numri i pasagjerëve për fluturimet charter ishte 2 384 apo 69% më i lartë se sivjet. Industria e aviacionit civil është një nga sektorët më të goditur nga pandemia e shkaktuar nga COVID-19, si pasojë e masave që morën vendet për të parandaluar përhapjen e infeksionit.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.