Ndër më të shtrenjtët në botë për internetin – Raporti i cilësisë së jetës dixhitale, na duhen 1556 minuta punë për ta përballuar
Shqipëria është ndër vendet e fundit në botë sa i përket çmimit të internetit, thotë indeksi më i fundit për vitin 2020 i cilësisë së jetës dixhitale. Sipas këtij indeksi, Shqipëria renditet në vendin e 76-të në botë ndër 85 shtete të marra në analizë sa i përket çmimit të përballueshëm të internetit me brez të gjerë. Raporti, në profilin dedikuar Shqipërisë, në nën-indikatorin e përballueshmërisë së çmimit nënvizon se një shqiptari mesatar i duhen 1556 minuta punë për të përballuar lidhjen më të lirë të internetit në shtëpi.
Kjo përkthehet në pak më shumë se 3 ditë mesatare pune, 8 orarëshe. Në indeksin e përgjithshëm ndërkohë, atë të cilësisë së jetës dixhitale, Shqipëria renditet e 55-ta në botë ndër 85 shtete. Sa i përket cilësisë së internetit ndërkohë, renditemi të 34-tët në botë ndër vendet e marra në analizë.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.