Ndërgjegjësohet sipërmarrja – 2016, të ardhurat nga tatim-fitimi rriten me 21%
Ndryshimet në sistemin e taksimit, gjatë viteve të fundit nga qeveria, kanë dhënë efektet e pritshme në të ardhurat e buxhetit të shtetit.
Sipas raportit vjetor të Drejtorisë së Përgjithshme e Tatimeve, duke parë të ardhurat nga tatim-fitimi, taksë që pësoi ndryshime tre vite më parë, për vitin 2016 ishin programuar 24.3 miliardë lekë dhe janë arkëtuar 29.2 miliardë lekë, me një mbirealizim prej 4.9 miliardë lekë, ose 20.28% më shumë.
Krahasuar me të njëjtën periudhë të vitit 2015, në të cilën u arkëtuan 25.1 miliardë lekë, të ardhurat nga ky tatim janë realizuar 4.2 miliardë lekë më tepër, ose në rritje me 16.54%.
Duke analizuar këto të dhëna, mund të themi që ndikimin kryesor në këtë rezultat e ka patur rritja e ndërgjegjësimit të taksapaguesve për deklarimin real të transaksioneve në import dhe zinxhirin e shitjeve.
Ndërsa si faktorë të tjerë përmendet faza e dytë e planit të veprimit kundër informalitetit të orientuar drejt kontrolleve bazuar në analizën e riskut dhe në vazhdimësinë e proceseve.
Thjeshtëzimi i procedurave të deklarimit dhe instalimi i një komunikimi permanent me operatorët e biznesit po gjeneron performancë më të lartë në të ardhurat tatimore.
Ndërkohë, rritja e ngarkesës tatimore duket se po sjell stabilitet në buxhet dhe në qëndrueshmërinë makroekonomike të vendit, pasi Shqipëria është një vend me fshehje të të ardhurave fiskale në vlerën afërsisht 40% të Prodhimit të Brendshëm Bruto.
Lidhur me këtë fenomen, gjatë vitit të kaluar, qeveria miratoi një paketë me lehtësi në procedura për biznesin.
Ndërkohë që tashmë është miratuar nga qeveria një lloj “amnistie” për detyrime të papaguara, që sipërmarrja i ka administratës fiskale, që sipas drejtuesve të Financave, tashmë është përfshirë në procedurat parlamentare.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.