Ndërhyhet në turizmin detar – Drafti/ Certifikim i operatorëve dhe rregulla të rrepta

Qeveria parashikon të zbatojë një reformë të thellë në sektorin e turizmit, me qëllim rigjallërimin e tij pas goditjes që mori nga pandemia COVID-19 gjatë 2020-2021, por edhe nga tërmeti. Kështu, në draftin e reformave ekonomike 2022-2024.  thuhet se përdorimi dhe optimizimi i potencialeve të pashfrytëzuara të turizmit siç është turizmi detar, shihet si një nga masat afatgjata për të mbështetur zhvillimin e sektorit të turizmit.

Turizmi detar, siç është provuar në vendet e tjera të rajonit si Kroacia, Mali i Zi, Greqia dhe Italia, është një industri kryesore dhe Shqipëria nuk po përfiton nga korridori i vlefshëm Mesdhetar për shkak të ekonomisë së saj të pakët të marinës.  Kështu masa reformuese synon të ndryshojë, harmonizojë dhe plotësojë legjislacionin dhe procedurat aktuale, për të krijuar një kuadër rregullator modern, në përputhje me rregulloret e BE-së dhe të përshtatur me nevojat dhe karakteristikat e veçanta të Ekonomisë Blu.

Synohet certifikimi i operatorëve të turizmit detar, i cili do të mundësojë ofrimin e aktiviteteve  si: lundrimi për qëllime turistike dhe argëtuese, surfing, zhytja rekreative, windsurfing, water skiing, wakeboarding, motor uji, peshkim turistik etj., vetëm nga operatorë të licencuar të turizmit detar, duke pasur kështu një ndikim pozitiv në standardet dhe sigurinë e shërbimit të turizmit detar. Në dokument thuhet se kjo reformë do të ketë një efekt pozitiv edhe në nxitjen e konkurrueshmërisë duke vendosur standarde dhe rregulla të qarta për të gjitha subjektet që operojnë në këtë sektor.

Turizmi ishte sektori më i goditur nga pandemia COVID 19, ku gjatë vitit 2020, numri i turistëve të huaj pësoi një rënie prej 58.5 % në krahasim me 2019-ën,  Sipas publikimit të Këshillit Botëror të Udhëtimit dhe Turizmit (WTTC) 2021, gjatë vitit 2020 sektori i turizmit regjistroi një kontribut total prej 1,5 milion dollarë, me një rënie prej 51.6% nga 2019-ta., ndërsa ardhurat nga turizmi hyrës u ulën me 53% për shkak të pasojave të COVID 19 si dhe tërmetit të vitit 2019.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.