Ndërhyn Banka e Kinës – Rrit normat në tregjet e parasë për të shmangur rreziqet financiare

Banka Qendrore e Kinës rriti normën e interesit në tregjet e parasë, ndërkohë që autoritetet përpiqen të reduktojnë rreziqet financiare që po cenojnë ekonominë. Ekonomia e dytë më e madhe në botë ka filluar të ngadalësohet gjatë muajve të fundit ndërkohë që qeveria po përpiqet të trajtojë rritjen gjigante të kreditit dhe fabrikat në mbikapacitet.

Lëvizja e Bankës Qendrore të Kinës erdhi pak orë pas rritjes së normës së interesit nga Rezerva Federale.  Disa të dhëna të publikuara këtë javë vunë në dukje ndikimin e përpjekjeve të Qeverisë për të ulur varësinë e vendit ndaj borxhit, ndërkohë që prodhimi industrial, investimet dhe tregu i pronave treguan sinjale të një ngadalësimi. Sipas analistëve kjo është një lëvizje simbolike që ndihmon stabilizimin e pritshmërive të tregut pas ndërhyrjes nga Rezerva Federale.

Hendeku mes titujve 10-vjeçarë amerikanë me ato kinezë është zgjeruar në 160 pikë bazë.  Banka Qendrore e Kinës rriti normën e marrëveshjes së anasjelltë të riblerjes (riverse repo) që përdoret për operacionet në treg të hapur, me 5 pikë bazë për afatet 7-ditore dhe 28-ditore.  Kjo ishte rritja e parë nga banka qendrore kineze që prej muajit Mars.

Zyra e Statistikave publikoi më herët gjatë javës se prodhimi industrial u rrit me 6.1% në Nëntori, në rënie nga muaji paraardhës. Investimet në aktive fikse u ngadalësuan në një rritje me 7.2%  në periudhën Janar Nëntor.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.