Ndërhyrjet pa kriter në mjedis – Mato: Impakte negative afatgjata në ekonomi

Ekonomia nuk mund të rritet duke dëmtuar mjedisin. Kështu shprehet për TV SCAN kreu i Ecolëvizja, Xhemal Mato, i cili thekson se ndotja e vazhdueshme për shkak të një zhvillimi të vrullshëm sjell impakte negative afatgjata në ekonomi.

Mato kërkon marrjen e masave për të ndaluar masakrat mjedisore.

“Ne mos t’ua marrim ato lloj pasurish natyrore që mund të jenë direkte si pyjet, uji, ajri, etj., por mund të jenë edhe pasuri që lidhen me jetën e njeriut më ngushtë, të cilat realisht duhet t’ua transmetojmë. Por të mburremi në këtë kohë që ne po zhvillohemi sepse i premë tërë pyjet edhe kemi boll dru, dhe ne zhvillohemi sepse industria erdhi investoi këtu, por tërë tymrat i hedh edhe ndot tërë zonënë e Krujës edhe fshatrat e tjera, zonat e tjera si Tirana, etj, ky nuk është zhvillim i qëndrueshëm”.

Mato renditi disa nga pasojat e ndërhyrjeve pa kriter në mjedis. Kreu i Ecolëvizja u shpreh se këto ndërhyrje prishin ekuilibrat mjedisorë duke sjellë ndotjen, por jo vetëm, ndikojnë negativisht edhe në turizëm si një ndër sektorët  që sjell të ardhura për ekonominë e vendit.

Sipas Bankës së Shqipërisë, vetëm për 2016-ën vendi ynë përfitoi 1.5 mld euro nga Turizmi.

“Shkatërrimi i lumenjve natyrisht rrezaton jo vetëm në biodiversitet, në natyrë, etj., por rrezaton edhe në bregdet, rrezaton edhe në turizëm, në  jetën sociale të fshatrave tona që iu eliminohet uji, dhe iu reduktohet uji. Pra, po të shihni, vetëm kjo lloj strategjie që quhet zhvillim, ndonjëherë sjell pasoja që janë krizë”, u shpreh Mato.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.