Ndërtimet, akses për PAK – Veliaj: Parkime dhe sinjale akustike për këtë kategori

Çdo ndërtim i ri në Tiranë nga tani e tutje, të garantojë aksesin e plotë për personat me aftësi të kufizuara. Kryetari i Bashkisë së Tiranës, Erion Veliaj, i pranishëm në aktivitetin me temë “Të ndryshëm, por të barabartë”, u shpreh se Tirana e ka këtë potencial.

Veliaj shtoi se Bashkia e Tiranës ka ndërmarrë një sërë masash lehtësuese edhe në fushën e transportit dhe infrastrukturës, në mbështetje të Personave me Aftësi të Kufizuara, duke vënë në dispozicion një flotë me 290 mjete dhe duke rehabilituar 377 stacione autobusësh.

Gjithashtu, Bashkia e Tiranës ka nisur vendosjen e sinjaleve akustike në nyjet kryesore me semaforë, si dhe është duke punuar për ndërtimin e rampave. Kreu i bashkisë garantoi krijimin e vendeve të parkimit të dedikuara për personat me aftësi të kufizuara, projekt ky që do të shtrihet në 400 rrugë të reja.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.