Ndërtimet pa leja, Vlora qarku më problematik – Prokuroria: Për vitin 2020 në total 1586 procedime, 730 të dënuar nga gjykatat

Vija bregdetar në jug të vendit ka qenë më problematikja për sa i përket gjithë vendit, ndërkohë që një volum I konsiderueshëm procedimesh penale për ndërtime pa leje është shënuar në gjithë territorin. Scan Televizion ka zbardhur të dhënat e Prokurorisë së Përgjithshme lidhur me ndërtimet pa leje për vitin e shkuar, nga të cilat rezulton rritje e numrit të të dënuarve për këtë vepër krahasuar me një vit më parë, pavarësisht se numri I rasteve të hetuara është më i vogël. Në total Prokuroritë në gjithë territorin kanë nisur 1586 procedime për ndërtime pa leje, në rënie prej 9% krahasuar me vitin 2019, ndërkohë që 730 persona janë dënuar me vendim gjykate.

Megjithëse numri më i lartë i procedimeve për vepra penale kundër rregjimit juridik të tokës, është regjistruar në prokurorinë e shkallës së parë Tiranë, 21 %, koeficienti më i lartë për 100 000 mijë banorë rezulton në qarkun Vlorë me 162 procedime dhe qarkun Kukës me 109 procedime.

Për këtë grup veprash, në kërkesat lidhur me llojin e masën e dënimit, të kërkuar nga prokurori, rezulton se në 92,71 % të të pandehurve është kërkuar aplikimi I pezullimit të dënimit dhe vendosja në provë. Gjykata ka vendosur në 93,16 % të dënimeve, aplikimin e pezullimit të dënimit dhe vendosjen në provë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.