Ndërtimet pa leje për strehim, ndërhyn Kushtetuesja – Ndërtoi shtëpinë e dëmtuar nga tërmeti, Gjykata shfuqizon nenin, gjoba joproporcionale

Gjykata Kushtetuese ka shfuqizuar një pikë të Ligjit “Për planifikimin dhe zhvillimin e territorit”, në pjesën që parashikon dënimin me gjobë për kryerjen e punimeve pa leje për plotësimin e nevojave për strehim pasi ajo nuk respekton parimin e proporcionalitetit.

Vendimi është marrë nga Gjykata këtë javë, pasi ajo mori në shqyrtim në seancë plenare mbi bazë dokumentesh, kërkesën e Gjykatës Administrative të Shkallës së Parë Tiranë, për kontrollin e pajtueshmërisë së vendosjes së gjobave për ndërtimet pa leje për nevoja strehimi. Mekanizmi u vu në lëvizje nga padia e një individi që ka kundërshtuar aktet administrative të dënimit me gjobë dhe të prishjes së objektit, që ai e ka ndërtuar pa leje për qëllime banimi pas tërmetit të vitit 2019.

Ndërkohë që sipas arsyetimit të Gjykatës Kushtetuese, kufizimi i të drejtës kushtetuese të pronës private duhet të respektojë kriteret e përcaktuara në nenin 17 të Kushtetutës.

Duke e analizuar çështjen sipas këtyre kritereve, Gjykata vlerësoi se ndonëse dënimi me gjobë për kryerjen e punimeve pa leje është bërë nëpërmjet një ligji të miratuar nga Kuvendi dhe i përgjigjet interesit publik për kontrollin e ligjshëm të territorit dhe frenimin/parandalimin e ndërtimeve pa leje, mënyra e llogaritjes së masës së gjobës për kryerjen e punimeve pa leje për plotësimin e nevojave të strehimit nuk respekton kriterin e proporcionalitetit.

Shkak për të cilin, në vendimin zyrtar, Gjykata Kushtetuese vendos të pranojë pjesërisht kërkesën e Gjykatës së Shkallës së parë, duke shfuqizuar pikën e nenit që përllogarit vlerën e gjobës.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.