Ndërtimet pa leje, rritje 122% – Bum objektesh të paligjshme në vitin zgjedhor, 1.987 procedime
Viti zgjedhor 2017 ka sjellë një bum ndërtimesh të paligjshme në gjithë territor.
Scan ka zbardhur raportimet zyrtare të prokurorive në gjithë vendin, sipas të cilave numri i ndërtimeve pa leje është rritur me 122% krahasuar me një vit më parë.
Nga 893 procedime të kryera në vitin 2016, numri ka kërcyer në 1.987 për vitin zgjedhor 2017.
Rritje ka shënuar edhe numri i personave të përfshirë në këtë vepër penale. Prokuroritë raportojnë se numri i të pandehurve të regjistruar është rritur me 86 % në vitin zgjedhor.
Numri i procedimeve të dërguara në gjykatë është rritur 48,5 % dhe numri i të pandehurve të dërguar në gjykatë është rritur 47,6 %.
Numrin më të madh të procedimeve të regjistruara për këtë vepër penale e ka prokuroria e shkallës së parë Tiranë, që përbën 23% të numrit total të procedimeve në shkallë vendi dhe në vijim prokuroria e shkallës së parë Shkodër që ka regjistruar 19 % të numrit total të procedimeve në shkallë vendi.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.