Ndihma ekonomike, Balla: E trefishuam në katër vite

Drejtuesi politik i PS në qarkun e Elbasanit për zgjedhjet e 25 Qershorit, Taulant Balla zhvilloi një takim elektoral me banorët e njësisë administrative Bradashesh në Elbasan.

Në fjalën e tij Balla u ndal tek trefishimi i ndihmës ekonomike sipas tij në këto katër vite.

“Dua t’i them të gjithë banorëve që janë në ndihmë ekonomike, që ndihmën ekonomike ta jep qeveria dhe kushdo që guxon të bëjë presion, ndonjë administrator me ndihmën ekonomike duhet ta dini se do të jetë subjekt i forcës së ligjit, sepse ndihma ekonomike është një instrument që e ka krijuar qeveria për të ndihmuar familjet në nevojë. Ndërsa pensionistëve dua t’ju them se qeveria e Edi Ramës ka planifikuar që në 4 vitet e ardhshme 240 milion dollarë t’i shtohen fondit të pensioneve, me qellim që pensionistët mos të jenë më të lënë pasdore. Të dashur pensionistë mos u gënjeni nga Luli, ai e ka si ai miku që do me gënjyer po nuk di, sepse thotë që do të uli taksën e biznesit të vogël dhe ndërkohë thotë do rris pensionet, por harron se taksa e biznesit të vogël është 0. Nga 0 ku do e ulësh më?”, theksoi Balla

Më tej gjatë fjalës së tij Balla tha se në Bradashesh do të bëjmë shumë punë, por mbi të gjitha duhet të fokusohemi tek punësimi, i cili është një prej problemeve më të mëdha që ka Elbasani.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.