“Ndikim te Enti për shtrenjtimin e dritave” – Kryeministri lajmëroi rritje çmimesh për të pasurit, Elezi: Tarifat duhet të rishikohen në ulje
Ekspertët i konsiderojnë si ndikim të papranueshëm te institucionet e pavarura, deklaratat e kryeministrit, Edi Rama për rritjen e çmimit të energjisë elektrike për një kategori konsumatorësh familjarë, të cilësuar si të pasur.
Eksperti i energjisë, Eduard Elezi thotë për TV SCAN se çmimet përcaktohen nga Enti Rregullator i Energjisë, ndërkohë që kreyministri mund të flasë vetëm për subvencionime që mund të ndërmerren nga qeveria për kategori të veçanta.
Elezi thotë gjithashtu, se në asnjë vend të botës nuk aplikohen çmime të diferencuara për qytetarët. Eksperti analizon edhe situatën aktuale, ku sipas tij nëse do të ketë ndryshime të tarifave ato do të duhet të ulen dhe jo të rriten.
Aktualisht konsumatorët familjarë paguajnë 9.5 lekë/këh për energjinë elektrike. Ky çmim u vendos pas heqjes së fashës prej 300 këh në vitin 2015, që aplikohej më herët si mbrojtje për kategoritë në nevojë. Kjo skemë nënkuptonte se deri në 300 kwh çmimi i energjisë llogaritej me 7.7 lekë, ndërsa çdo kilovat i konsumuar mbi këtë fashë llogaritej me 12.5 lekë.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.