Ndotja industriale në Elbasan, Balla dhe Sejdini kritika ministrisë dhe inspektoriatit të Mjedisit: Të marrin masa emergjente
Kreu i deputetëve socialistë Taulant Balla i kërkon publikisht ministrit të Mjedisit dhe kreut të Inspektoriatit të Mjedisit që të marrin masa për ndotjen që krijojnë Uzinat e kromit dhe rafineria e naftës në Elbasan. Referuar njoftimit zyrtar të PS-së, uzinat e Kromit dhe Rafineria e Naftës në Elbasan janë gjetur në befasi sot nga Kryetari i Grupit Socialist Taulant Balla, Kryetari i Bashkisë Qazim Sejdini dhe deputetët Evis Kushi dhe Arben Kamami.
Balla ka kritikuar Inspektoriatin e Mjedisit, që sipas tij, nuk bën detyrën.
“I kërkojmë Ministrit të Mjedisit Blendi Klosi, por edhe Drejtorit të Përgjithshëm të Imspektoriatit të Mjedisit marrjen e masave emergjente. Nuk mund të tolerohet 1 vit afat për të vënë në punë pluhurkapëset. Duhet të jetë e kundërta, të vendosen pluhur kapëset pastaj të fillojë puna. Në këtë drejtim ne do të jemi armiqtë tuaj kryesorë, nese nuk respektoni mjedisin, si deputetë të Elbasanit dhe do të jemi mbështetësit tuaj më të mëdhënj, nëse respektoni rregullat” tha Balla.
Kryebashkiaku Sejdini tha se ajri i qytetarëve nuk mund të ketë afate 1 apo 2 vjeçare, kjo sipas tij, është e patolerueshme. “Unë i drejtohem Ministrit Klosi të vijë vetë të shohë gjendjen dhe ndotjen që ekziston dhe gjithë këtë ndotje e ka jo vetëm zona rrotull, por po aq të ndotura janë ujërat nëntokësore dhe mbitokësore. Në emër edhe të Këshillit Bashkiak i drejtohem Ministrit të marrë masa për heqjen e licensës të gjithë atyre firmave që nuk plotësojnë kushtet dhe standardet kombëtare e ndërkombëtare” tha Sejdini.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.