Ndryshime në drejtimin e Shoqatës së Investitorëve të Huaj! Kush është kryetari i ri, Tom Kristian Larsen
Shoqata e Investitorëve të Huaj në Shqipëri (FIAA) njofton mbi rezultatin e mbledhjes së Asamblesë së Anëtarëve, gjatë së cilës u zgjodhën 3 Anëtarë të rinj Bordi me përfaqësues nga kompanitë kryesore të huaja në vend përkatësisht, STATKRAFT, SHELL dhe ANTEA Cement, si edhe zgjedhjen e Kryetarit të ri të saj, Tom Kristian LARSEN i cili është Drejtuesi Ekzekutiv i Statkraft në Shqipëri.
“FIAA është institucioni më i respektuar që përfaqëson komunitetin e biznesit në Shqipëri, mban një pozicionim të lartë në komunitetin e biznesit, institucionet qeveritare dhe misionet e huaja dhe vijon në përmbushjen e misionit të saj në përmirësimin e klimës së biznesit në vend. Statkraft është lider në etikën e biznesit, politikat kundër korrupsionit dhe vlerat e integritetit me përvojë dhe praktikë në zbatimin e tyre. Jam i nderuar për zgjedhjen si President i FIAA-s për mandatin e ardhshëm, dhe do të punoj në përhapjen e mesazhit të integritetit dhe sjelljes së duhur të biznesit në FIAA, midis anëtarëve të saj dhe komunitetit të biznesit në tërë. Shqipëria ka një potencial të madh për të tërhequr investime të huaja, por ajo duhet të luftojë korrupsionin dhe të forcojë reputacionin dhe cilësinë e institucioneve të saj për ta bërë atë të mundur. Pres me padurim që të përfaqësoj FIAA-n në këtë udhëtim” – u shpreh Tom Kristian Larsen.
Shoqata e Investitorëve të Huaj në Shqipëri me një prezencë prej 18 vitesh, ka qenë dhe vijon të mbetet një partner me rëndësi në zhvillimin dhe integrimin ekonomik të Shqipërisë. Shoqata ka konsoliduar një bashkëpunim të qëndrueshëm me Autoritetet lokale dhe ndërkombëtare në vend, duke e pozicionuar veten pjesë të strukturave të ndryshme konsultuese me fokus klimën e biznesit në vend dhe thithjen e investimeve të reja.
Statkraft është një kompani shtetërore norvegjeze dhe është prezente në Shqipëri që nga viti 2008 me Devoll Hydropower, i cili përfaqëson një nga investimet e huaja më të mëdha në vend në industrinë e energjisë së rinovueshme.
Larsen është një profesionist me eksperiencë ndërkombëtare në Europë dhe Azi, në sektorë të rëndësishëm si telekomunikacion dhe të energjisë së rinovueshme në kompani globale si Telenor, Statoil dhe Statkraft.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.