Ndryshime në strukturën e OSHEE – ERE transferon 2 licencat: Të bëhet dhe ndarja e punonjësve

Enti Rregullator i Energjisë ka miratuar transferimin e licencave për 2 kompanitë e reja të krijuara nga ndarja e Operatorit të Shpërndarjes së Energjisë Elektrike, duke i hapur rrugën operimit të tyre nga data 1 janar 2019.

Më konkretisht është bërë kalimi për Furnizuesin e Shërbimit Universal dhe Operatori i Sistemit të Shpërndarjes, ndërkohë që gjatë periudhës së mbetur deri në nisjen e funksionimit, OSHEE detyrohet të bëjë ndarjen e personelit dhe borderove përkatëse.

Më herët, Enti Rregullator i Energjisë licencoi dhe Furnizuesin e Tregut të Lirë, që është operatori që do të kryejë furnizimin e konsumatorëve që janë pjesë e tregut të parregulluar e ku aktualisht bëjnë pjesë bizneset e lidhur në tensionin 35 KV.

Këto biznese do të kenë çmim të luhatshëm të energjisë, në bazë vendimeve të ERE-s pra jo si abonentët e tjerë të cilët kanë çmim fiks të përcaktuar nga Enti Rregullator.

Ndërkohë që, të gjithë abonentët e tjerë do të furnizohen me energji nga kompania tjetër e krijuar që është Furnizuesi i Shërbimit Universal.

Kompania e tretë e krijuar është Operatori i Sistemit të Shpërndarjes që ka për detyrë, zhvillimin, operimin dhe mirëmbajtjen e rrjetit të të gjitha nivel.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.