Ndryshime tek Drejtoria e Patentave – Kush është Arben Isaraj që zëvendëson ish-drejtorin e LSI

Në krye të drejtorisë së Patentave Arben Isaraj do të zëvendësojë Ylli Spahiun, i cili ishte emëruar nga Lëvizja Socialiste për Integrim. Pas prishjes së koalicionit, drejtori i këtij dikasteri do të jetë tashmë, Isaraj, ish Zëvendësministër i Drejtësisë prej vitit 2013.

I lindur në Vlorë më 21 Prill 1966, ai ka një karrierë të gjatë akademike dhe politike. Pasi u diplomua për jurist në vitin 1988, ai ka punuar si asistent dhe pedagog për mbi 10 vjet pranë Fakultetit të Drejtësisë.

Isaraj është i pranishëm në jetën politike prej vitit 1998, ku ka ushtruar detyra të ndryshme si Këshilltar Juridik dhe Këshilltar i Sigurisë Kombëtare i disa Kryeministrave dhe ministrit të Mbrojtjes, Inspektor i Përgjithshëm i Shërbimit Informativ Shtetëror, Zëvendësministër i Rendit Publik.

Në zgjedhjet e vitit 2005, ai kandidoi për deputet nën siglën e Partisë Socialiste në Vlorë, duke fituar mandatin e parë. Katër vjet më pas ai kryesoi listën zgjedhore në këtë qark duke u rizgjedhur deputet.

Gjatë dy mandateve të tij, ai ka patur detyra si  sekretar e nënkryetar i Grupit Parlamentar të Partisë Socialiste, ndërsa ishte pjesë përbërëse e komisioneve të të ligjeve dhe sigurisë kombëtare.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.