Ndryshimet klimatike – “Ekonomia Blu” mund të zgjidhë krizën dhe të krijojë 12 milionë vende pune
Duke mbuluar mbi 70% të sipërfaqes së tokës, oqeanet kanë potencial masiv për të luftuar ndryshimin e klimës dhe për të nxitur ekonomi të qëndrueshme. Ky është vlerësimi optimist i 14 shteteve bregdetare dhe oqeanike, të bashkuar në Panelin e Nivelit të Lartë për një Ekonomi të Qëndrueshme të Oqeanit, ose “Panelin e Oqeanit”.
Kolektivi global që përfshin pothuajse 40% të vijave bregdetare të botës ka njoftuar angazhimin për të menaxhuar në mënyrë 100% të qëndrueshme, oqeane kombëtare të qëndrueshme deri në vitin 2025.
Premtimi përfshin masa për të zbutur ndryshimet klimatike, ndërsa ngrohja e oqeaneve “zhyt” vendet bregdetare në një emergjencë klimatike. Paneli i Oqeanit vëren se mbrojtja e barishteve të detit dhe kënetave të kripura që përmbajnë ekosisteme ‘karboni blu’, mund të ndihmojë në “sekuestrimin” e karbonit, në mënyrë që të përmbushë synimet e uljes së emetimeve, të marrëveshjes klimatike të vitit 2050 të Parisit, të cilat janë të nevojshme për të kufizuar ngrohjen globale në 1.5 gradë Celsius.
“Karboni blu mund të ‘sekuestrojë’ dioksidin e karbonit me shpejtësi deri në katër herë më shumë se ato të pyjeve tokësore, në bazë të zonës” tha Janis Searles Jones, CEO i Ocean Conservancy, një Organizatë Jo – Qeveritare me bazë në Shtetet e Bashkuara të Amerikës, e përkushtuar në mbrojtjen e oqeaneve.
Planet e qëndrueshme të oqeanit gjithashtu synojnë të ndalojnë humbjen e biodiversitetit, të kujdesen për ndotjen dhe të ndalojnë peshkimin e tepërt dhe peshkimin e paligjshëm, i cili aktualisht po kërcënon jetën detare në shumë shtete.
Qëllimi përfundimtar është ringjallja e qëndrueshme e ekonomive dhe kulturave të bazuara në det, të cilat mbështeten në peshkimin dhe turizmin. Siç detajohet në disa raporte speciale të Panelit të Oqeanit, ekonomi të tilla blu do të krijojnë 12 milionë vende pune dhe do të prodhojnë deri në gjashtë herë më shumë ushqim nga oqeani, deri në vitin 2025.
Burimi origjinal: Reuters
Përshtati në shqip: SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.