Ndryshimet klimatike, BE pësoi 450 miliardë euro dëme – Të ardhmen e kërcënojnë përmbytjet e thatësirat

Humbjet totale ekonomike të ardhura për shkak të ndodhive ekstreme klimatike në hapësirën europiane për periudhën 1980-2016 kapin 450 miliardë euro. Kjo shumë është rezultati i përllogaritjeve të Agjencisë Europiane për Mjedisin, bazuar mbi raportin e ndryshimeve klimatike dhe reduktimit të rrezikut për katastrofa në Bashkimin Europian.

Pjesa më e madhe e dëmeve është shkaktuar nga përmbytjet (40%), ndjekur nga stuhitë (25%), thatësira (10%) dhe valët e të nxehtit (5%). Mbulimi me siguracione i këtyre risqeve ishte në përgjithësi 35%.

Por fenomeni më i rrezikshëm janë valët e të nxehtit, pasi shkaktojnë më shumë viktima, sidomos mes shtresave më të ndjeshme të shoqërisë, si të moshuarit. Kjo ndodh edhe për shkak se këto valë nxehtësie i bashkohen edhe ndotjes atmosferike, duke përkeqësuar sëmundjet respiratore dhe kardiovaskulare.

Në zonën e Europës Jugore, ku përfshihet edhe Shqipëria, valët e të nxehtit janë përgjegjëse për rreth 178 vdekje për 1 milion banorë, ndërsa rreziku i dytë më i madh, përmbytjet, janë përgjegjëse për vetëm 6.75 vdekje për 1 milion banorë.

Shteti më i dëmtuar rezulton të jetë Italia, e cila ka regjistruar humbjet ekonomike më të mëdha dhe është e dyta për numrin e viktimave, mbi 20 mijë, pas Francës me 23 mijë viktima. Dëmi ekonomik për gadishullin Apenin arrin në 64,9 miliardë euro.

Raporti fokusohet edhe në të ardhmen, ku paralajmëron skenarët e mundshëm të katastrofave klimatike.

Frekuenca e përmbytjeve do të trefishohet brenda vitit 2080 në Francën jugore, veriun e Italisë dhe në rajonin e Danubit. Ndërsa thatësira do të shënojë një shtim të ndjeshëm në rajonin e Mesdheut dhe në veçanti në gadishullin Iberik, Francë, Itali dhe Shqipëri.

Gjithashtu, me rritjen e temperaturave, shkrirja e borës në majat alpine do t’i bëjë Alpet edhe më pak të sigurta, ndaj priten orteqe mbi 200 metra lartësi.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.