Ndryshimi i buxhetit, borxhi publik në 80% të PBB-së – Qeveria përjashton 2021-shin nga rregullat fiskale: “Do të sjellë mirëqenie për qytetarët”

Ndërhyrja e 4-t që i është bërë buxhetit të shtetit për këtë vit, ku parashikohet një rritje e mëtejshme e shpenzimeve në masën 11.8 mld lekë, ose rreth 96 milionë euro, si dhe emetimi i një eurobondi në vlerën e 500 milionë euro për të mbuluar këto shpenzime dhe të tjera, do të sjellin një rritje të ndjeshme të nivelit të borxhit publik në raport me Prodhimin e Brendshëm Bruto, deri në 80%. Këtë gjë e thotë vetë qeveria shqiptare nëpërmjet aktit normativ numër 25 që parashikon disa ndryshime në ligjin organik të buxhetit të shteit. Ndërhyrjet ne ligjin organik janë bërë pikërisht në nenin 4 të tij, që imponon një normë të borxhit publik në 45% të Prodhimit të Brendshëm Bruto.

Qeveria shqiptare në relacionin shoqërues të këtij akti normativ sqaron se, këto ndryshime janë të nevojshme pas dy goditjeve të njëpasnjëshme që ka marrë ekonomia shqiptare, pas tërmetit dhe pandemisë. “Një stimul i mëtejshëm fiskal nga ana e shpenzimeve buxhetore do të ofronte garanci të mëtejshme për nivele më të larta e të qëndrueshme të rritjes ekonomike në periudhën afatmesme dhe atë afatgjatë, duke ofruar njëkohësisht më shumë punësim e mirëqënie për qytetarët e vendit si dhe më shumë burime publike, por edhe reduktimin më të shpejtë të stokut të borxhi publik, i cili vijon të mbetet një objektiv madhor i qeverisë”-thuhet në ralacionin shoqërues të aktit normativ.

“Në këtë kontekst, draftplani i aktit normativ, i 4-t për rishikimim e buxhetit 2021 që do të dërgohet për miratim, parashikon një rritje të shpenzimeve kapitale, duke rritur kësisoj dhe defiçitin buxhetor me rreth 0.6% të PBB-së dhe rrjedhimisht rritur edhe stokun e borxhit publik nga 76.1% në vitin 2020, në rreth 80% të PBB-së”-nënvizon qeveria. Për këto arsye të përmendura, qeveria shqiptare ka vendosur të përjashtojë vitin 2021 nga parimet dhe rregullat fiskale, të përcaktuara në nenin 4 të ligjit organik të buxhetit të shtetit, si norma tavan e borxhit publik, balanca primare apo ajo buxhetore.

Pavarësisht retorikës së qeverisë shqiptare për angazhim maksimal në konsolidimin fiskal dhe mbajtjen e nivelit të borxhit publik të qëndrueshëm, ky vendim për të përjashtuar vitin 2021 nga rregullat fiskale si dhe rritja e borxhit publik deri në 80% të Prodhimit të Brendshëm Bruto, mund të ketë ndikim edhe në vlerësimin e agjencive më të mëdha të vlerësimit të kreditit. Moody`s dhe Standard and Poor`s kanë paraljmëruar  një zhvlerësim të notës së vendit tonë mund të vijë në rast se do të konkretizohet një rritje e mëtejshme e borxhit publik apo të vihet re një përkeqësim i konsolidimit fiskal. Një zhvlerësim i tillë do të kishte kosto të mëdha, sidomos në normat e interesit të huamarrjes së qeverisë shqiptare.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.