Ndryshimi i ekonomisë – Basha: Do të hapim vende të reja pune

Mitingu i radhës përmbyllës nga Partia Demokratike është zhvilluar në qytetin e Kukësit.

Kreu i demokratëve, Lulzim Basha është shprehur se vendi ka nevojë për një qeverisje e cila do të bazohet në zhvillimin e ekonomisë së vendit. Basha ka kërkuar votën e banorëve të Kukësit duke sjellë edhe një herë në vëmendje planin e tij ekonomik.

“E vetmja zgjidhje është plani ekonomik i Partisë Demokratike. Është plani im ekonomik i hartuar me ndihmën e ekspertëve më të mirë të lokomotivës europiane të ekonomisë të Angela Merkel. Objektivi i këtij plani është që shqiptarët, kuksianët, hasianët, tropojanët, të mos ia mbathin nga shtëpitë e tyre për të shkuar në vende të huaja por, këtu në Kukës, Has e Tropojë e në gjithë Shqipërinë të krijojmë kushte për ekonominë e fortë, për vendet e punës që mungojnë. Dhe kësaj do t’ia dalim së bashku. Ndryshimi për të cilin votoni me 25 Qershor është ndryshimi ekonomik. Janë taksat e ulëta, është ulja e TVSh-së, është largimi njëherë e mirë i terrorit mbi sipërmarrjen dhe njerëzit e thjeshtë. Është mbështetja me subvencione për fermerët kuksianë, hasianë dhe tropojanë. Është injektimi i 400 milionë eurove në xhepat tuaja vetëm me uljen e TVSH-së për të ringjallur konsumin, prodhimin dhe vendet e punës. 0 vende pune, 0 subvencione, 0 ndihmë për Qarkun e Kukësit nga rilindja. Ndaj do ta nxirrni Ramën me 0 deputetë”, tha Basha.

Kryedemokrati ka kërkuar që të bëhet kujdes me sigurinë e votës, pasi nuk do të lejojnë askënd që ta vjedhë atë. Kushdo që do të abuzojë me votën do të duhet që të përballet me ligjin.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.