Ndryshimi i projektit të unazës – Pas më shumë se 2 vitesh, ARRSH finalizon tenderin për një segment të ri

Pas më shumë se 2 vitesh zvarritje, Autoriteti Rrugor Shqiptar ka shpallur kompaninë fituese  që do të projektojë segmentit të ri të Unazës së Madhe që do të lidhë sheshin Shqiponja me bulevardin e ri të Tiranës. Fondi limit për realizimin e projektit ishte 32.3 mln lekë, ndërkohë që fitues është shpallur bashkimi i operatorëve SEED CONSULTING & ATELIER 4, me një ofertë prej 30.416.000 lekësh.

Projektimi i këtij segmenti u kërkua fillimisht në vitin 2018, por pavarëisht kësaj ARRSH rihapi tenderin në shtator të këtij viti, çka bëri që fituesi të shpallet pikërisht tani.  Sipas dokumenteve të tenderit, objekti do të fillojë në pikën e sotme fundore që është segmenti nga mbikalimi i pallatit me shigjeta  te rrethrrotullimi Shqiponja dhe do të vazhdojë përgjatë rrugës ”Vangjel Noti”.

Më pas do të kryqëzohet me rrugën:” Adem Jashari”, do të vazhdojë në një zonë ndërtimesh të reja e deri ne shtratin e Lumit te Tiranes. Më pas parashikohet të vazhdojë më tej me kalimin e lumit te Tiranes përmes një ure ku më pas do te zhvillohet ne krahun e majte të lumit të Tiranës ne krah te kodrave te Paskuqanit deri ne piken e takimit me Bulevardin e ri te Tiranes me një gjatësi rreth 3 km.

Ndërtimi i këtij segmenti të ri pritet të lehtësojë lëvizjen e trafikut në një nga zonat me problematikë të Tiranës si dhe të krijojë një infrastrukturë bashkëkohore për lëvizjen e mjeteve, të këmbësorëve dhe biçikletave.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.