Ndryshojnë kartelat e pronave. Agjencia e Kadastrës miraton modelet e reja të dokumentimit të pasurive të paluajtshme
Një vendim i miratuar javës së shkuar nga Këshilli i Ministrave ndryshon rrënjësisht modelet dhe elementet e akteve hipotekore, duke nisur nga Kartela e pasurisë së paluajtshme; Certifikata e pronësisë dhe e të drejtave reale; Harta kadastrale dhe plani i rilevimit për punime kadastrale; Vërtetimi nga regjistrat e veçantë (hipotekore ose të lejes së ndërtimit dhe karabinasë); e deri të Aktet e tjera kadastrale që lëshohen nga Agjencia Shtetërore e Kadastrës.
Emëruesi i përbashkët i ndryshimeve janë sistemet dixhitale hartografike dhe ato të përpunimit të të dhënave. Hartat kadastrale do të plotësohen dhe ruhen në format elektronik, në sistemin e regjistrit digjital të pasurive të paluajtshme. Ndërkohë që harta e printuar nga regjistri digjital i pasurive të paluajtshme përbën kopjen manuale të hartës kadastrale dhe vlen vetëm për administrim dhe ruajtje nga ASHK-ja, në cilësinë e dokumentacionit shkresor, në përputhje me legjislacionin për arkivat.
Kartelat manuale të pasurive të paluajtshme të krijuara përpara hyrjes në fuqi të këtij vendimi dhe regjistrat e përdorur për zonat kadastrale pa regjistrim fillestar sekretohen dhe arkivohen sipas rregulloreve përkatëse në përputhje me legjislacionin për arkivat. Pas hyrjes në fuqi të këtij vendimi, të gjitha veprimet në kartelën e pasurisë kryhen vetëm në format digjital, në përputhje me përcaktimet e kreut II, të këtij vendimi.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.