Ndryshojnë punësimet në shëndetësi – Projektligji: Jo më punë në 2 specialitete të ndryshme, pezullim diplomës
Të gjithë profesionistët, që kanë përfituar më shumë se 1 profesion në fushën e shëndetësisë nuk do të mund të ushtrojnë njëkohësisht secilin prej tyre. Gjithçka parashikohet në një projektligj të Ministrisë së Shëndetësisë dhe Mbrojtjes Sociale, i cili ka mbërritur në Kuvend për diskutim.
Sipas ndryshimeve të propozuara, këta profesionistë duhet të deklarojnë profesionin që duan të zgjedhin pranë urdhrave profesionistë përkatës, duke pezulluar në këtë mënyrë të drejtën e ushtrimit të profesioneve të tjerë”.
Ndërkaq, ministria sqaron se kjo dispozitë nuk ndalon dypunësimin e mjekëve, por vetëm ndalon ushtrimin e 2 profesioneve të ndryshme. “Në rastin kur një profesionist ka 2 profesione, siç mund të jetë stomatolog dhe farmacist, ai duhet të zgjedhë cilin profesion të ushtrojë dhe paralelisht të pezullojë diplomën tjetër”-, sqaron ministria.
Gjithashtu, ky dikaster shton se ndryshim vjen pas shqetësimit të ardhur nga urdhrat profesionalë, pasi ushtrimi njëkohësisht i 2 profesioneve shpesh është fiktiv. Ndërkaq, projektligji sjell edhe ndryshime të tjera që lidhen me punësimi e infermierëve, duke sanksionuar me ligj faktin se rekrutimet do të bëhen përmes portalit “Infermierë për Shqipërinë”.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.