Ndryshojnë rregullat për strukturat akomoduese – Urdhri/ Aplikimi për certifikatën e kategorizimit dhe TVSH-në 6%, përmes e-Albania
Dixhitalizimi i shërbimeve dhe dokumenteve nga data 1 Maj dhe në vazhdim, ka ndryshuar edhe rregullat në sektorin e turizmit. Ministria e Turizmit, ka nxjerrë një urdhër të posaçëm i cili është botuar në Fletoren Zyrtare, mbi mënyrën e funksionimit të strukturave akomoduese, ku përcaktohet se “çdo subjekt që ushtron veprimtarinë si strukturë akomoduese është i detyruar të aplikojë në portalin e-Albania, për pajisjen me certificate kategorizimit, për të përfituar shkallën e reduktuar të tatimit mbi vlerën e shtuar, e cila aplikohet për furnizimin e shërbimit të akomodimit në strukturat akomoduese”.
Sipas urdhrit në fjalë, procedura e kategorizimit të strukturave akomoduese i nënshtrohet tre fazave: në fazën e parë, sipërmarrësi turistik, që ushtron veprimtarinë si strukturë akomoduese, duhet të aplikojë online në portalin e-Albania duke plotësuar
formularin e aplikimit dhe dokumentacionin përkatës, ndërsa faza e dytë dhe e tretë përfshin procesin e shqyrtimit nga ana e Komisionit të Standardizimit të Veprimtarive Turistike dhe verifikimin në terren.
Po ashtu, me urdhrin e ri, formulari i vetëdeklarimit nuk dorëzohet më dorazi në Ministrinë përgjegjëse, por sipërmarrësi turistik, që ushtron veprimtarinë si strukturë akomoduese, duhet të aplikojë online në portalin e-Albania duke plotësuar formularin e aplikimit dhe dokumentacionin përkatës.
Gjithashtu, dokumentacioni i aplikimit për pajisjen me certifikatë kategorizimi, nuk do të dorëzohet më dorazi dhe i noterizuar, kriter ky i vendosur në urdhrin e mëparshëm, por subjekti plotëson formularin e aplikimit në portalin e-Albania dhe ngarkon dokumentacionin e nevojshëm.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.