Ndryshojnë udhëzimet, kushtet e reja për përfitimin e ndihmës ekonomike. Pagesat për çdo kategori dhe kriteret për t’u përfshirë në skemë

Ndryshojnë udhëzimet për përfitimin e ndihmës ekonomike. Konkretisht janë publikuar ndryshimet në udhëzimin 4 dhe 5 të datës 17.02 2017, për përllogaritjen e ndihmës ekonomike dhe për fondin e kushtëzuar për bllok- ndihmën ekonomike deri në 6 për qind.

Në këto dy dokumente, ndryshimi ka të bëjë me hyrjen në fuqi të udhëzimeve dhe me shtrirjen e efekteve, ku konkretisht thuhet se “Udhëzimet hyjnë në fuqi me botimin në Fletoren Zyrtare dhe i shtrijnë efektet nga data 1.9.2017”

Masa e përfitimit të ndihmës ekonomike

Por çfarë parashikojnë më gjatë, udhëzimet për përfitimin e ndihmës ekonomike. Udhëzimi i parë thotë se Drejtoria Rajonale e Shërbimit Social Shtetëror pas vlerësimit sipas sistemit të pikëzimit për familjarët dhe individët, llogarit masën e ndihmës ekonomike. Pavarësisht nga përbërja e saj, masa maksimale e plotë e ndihmës ekonomike për familjen nuk mund të jetë më e lartë se 8 000 (tetë mijë) lekë në muaj.

Masa e ndihmës ekonomike, në muaj, për prindërit me më shumë se dy fëmijë të lindur njëherësh është:

a) për trinjakë, 3000 (tremijë) lekë për çdo fëmijë;

b) për katërnjakë, 4000 (katërmijë) lekë për çdo fëmijë;

c) për pesënjakë, 5000 (pesëmijë) lekë për çdo fëmijë.

Kjo ndihmë ekonomike përfitohet deri në moshën 18 vjeç.

“Masa e ndihmës ekonomike për viktimat e trafikimit është 3000 (tremijë) lekë në muaj dhe përfitohet pas daljes nga institucionet e përkujdesjes shoqërore, deri në çastin e punësimit të tyre. Masa e ndihmës ekonomike për çdo viktimë të dhunës në marrëdhëniet familjare që nuk trajtohen në institucionet e përkujdesjes shoqërore, është 3000 (tremijë) lekë në muaj. Kjo ndihmë ekonomike përfitohet gjatë periudhës së vlefshmërisë të urdhrit të mbrojtjes ose urdhrit të menjëhershëm të mbrojtjes, të përcaktuar në vendimin e gjykatës. Masa e ndihmës ekonomike për çdo jetim është 3000 (tremijë) lekë në muaj. Kjo ndihmë ekonomike përfitohet nga jetimët që nuk janë në institucione deri në çastin e punësimit të tyre”.

Masa e ndihmës ekonomike për familje llogaritet:

a) 1800 (njëmijë e tetëqind) lekë për anëtarin e parë të familjes sipas renditjes në certifikatën

familjare;

b) 1260 (njëmijë e dyqind e gjashtëdhjetë) lekë për anëtarët e tjerë të familjes mbi moshën 18 vjeç;

c) 900 (nëntëqind) lekë për anëtarët që janë në dhe nën moshën 18 vjeç.

“Kur në përbërjen e strukturës së familjes, për efekt të llogaritjes së masës së ndihmës ekonomike, mbetet vetëm një anëtar, masa e ndihmës ekonomike për këtë të fundit është ajo e llogaritur për këtë anëtar. Për rastet kur familja e përzgjedhur për të përfituar ndihmë ekonomike, është e përbërë vetëm nga një anëtar, i cili është mbi moshë punë masa e ndihmës ekonomike është 2.600 (dymijë e gjashtëqind) lekë. Anëtarët e familjes, fëmijë, për të cilët vërtetohet që ndjekin arsimin bazë deri në moshën 16 vjeç, marrin një shtesë në masën 300 (treqind) lekë në muaj gjatë vitit shkollor.  Anëtarët e familjes, fëmijë, për të cilët vërtetohet që janë vaksinuar sipas kalendarit të vaksinimit marrin një shtesë në masën 100 (njëqind) lekë, për çdo vaksinë të kryer. Për bashkëshortët në proces zgjidhje martese, kur ende nuk ka një vendim gjykate të formës së prerë, masa e ndihmës ekonomike për secilin bashkëshort, do të jetë e përllogaritur në bazë të strukturës së familjes. Për anëtarin e familjes në nevojë, që është person me aftësi të kufizuar, invalid pune, nuk llogaritet masë ndihme ekonomike në strukturën e masës së ndihmës ekonomike për familjen. Të drejtën për ta tërhequr dhe marrë në dorëzim ndihmën ekonomike për familjet në nevojë e ka bashkëshortja. Për rastet kur në strukturën e familjes bashkëshortja mungon të drejtën e tërheqjes e ka kryetari i familjes. Ky udhëzim hyn në fuqi me botimin në Fletoren Zyrtare dhe i shtrin efektet nga data 1.9.2017”, thuhet në udhëzim.

Udhëzimi  për përdorimin e fondit të kushtëzuar për bllok-ndihmën ekonomike deri në 6 për qind

Këshilli i Bashkisë ka të drejtë të miratojë dhënien e ndihmës ekonomike për familjet që nuk janë përfituese nga sistemi i pikëzimit, duke përdorur deri në 6% nga fondi i kushtëzuar për bllok ndihmën ekonomike. Mbi këtë fond mund të shtohen ose jo edhe fonde të buxhetit vendor.

“Akordimi i fondit deri në 6 për qind do t’i shtohet çeljes faktike të çdo 2-mujori që transferohet për përfituesit e ndihmës ekonomike të përzgjedhura nga sistemi i pikëzimit. Këshilli i Bashkisë miraton në fillim të vitit kriteret për familjet në nevojë që do të trajtohen me fondin deri në 6 për qind. Familjet në nevojë do të përzgjidhen nga lista e familjeve që kanë aplikuar brenda tre muajve të fundit nëpërmjet regjistrit elektronik për ndihmë ekonomike dhe që nuk janë shpallur përfitues nga sistemi i pikëzimit. Familjet në nevojë që do të trajtohen me ndihmë ekonomike do të miratohen me vendim të Këshillit Bashkiak. Për familjet që do të trajtohen me ndihmë ekonomike duhet të jetë kryer paraprakisht vlerësimi social ekonomik në familje nga administratori shoqëror sipas shtojcës 2, të vendimit nr. 955, datë 7.12.2016, të Këshillit të Ministrave, “Për përcaktimin e kritereve, të procedurave, dokumentacionit dhe masës së përfitimit të ndihmës ekonomike”. Struktura përgjegjëse për shërbimet sociale në Bashki harton projektvendimin për familjet në nevojë nën juridiksionin e Bashkisë, në bazë të propozimeve dhe vlerësimeve social ekonomike të ardhura nga njësitë administrative, për trajtim me ndihmë ekonomike nga fondi i kushtëzuar deri në 6 për qind. Struktura përgjegjëse për shërbimet sociale në Bashki përllogarit fondin për mbulimin e familjeve në nevojë që do të trajtohen nga fondi i kushtëzuar deri në 6 për qind dhe e dërgon për miratim në Këshillin e Bashkisë. Masa e ndihmës ekonomike për familjet llogaritet sipas strukturës së familjes, përcaktuar në udhëzimin e ministrit përgjegjës për çështjet sociale “Për përllogaritjen e përfitimit të ndihmës  ekonomike”, thuhet në udhëzim.

Nuk mund të trajtohen në bazë të këtij udhëzimi:

a) familjet të cilat nuk kanë aplikuar për ndihmë ekonomike sipas vendimit nr. 955, datë 7.12.2016 të Këshillit të Ministrave “Për përcaktimin e kritereve, të procedurave, dokumentacionit dhe masës së përfitimit të ndihmës ekonomike”;

b) familjet të cilat trajtohen me ndihmë ekonomike sipas vendimit nr. 955, datë 7.12.2016 të Këshillit të Ministrave, “Për përcaktimin e kritereve, të procedurave, dokumentacionit dhe masës së përfitimit të ndihmës ekonomike”. Ky udhëzim hyn në fuqi me botimin në Fletoren Zyrtare dhe i shtrin efektet nga data 1.9.2017.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.