Ndryshon financimi në bujqësi – Investimet në agroturizëm, parapagesë në masën 30 për qind të vlerës

Ministria e Bujqësisë ka ndryshuar mënyrën e mbështetjes financiare për fermerët, për të bërë të mundur që fondet e vëna në dispozicion të përthithen më lehtë.

Kështu, më parë skema ka qenë e tillë, që përfituesit e projekteve, duhet të bënin më parë investimin dhe më pas të përfitonin në formë granti deri në 70 për qind të financimit,  duke vënë në vështirësi financiare sipërmarrësit në bujqësi apo fermerët, gjë që jo rrahë herë përfundonte në mos realizim të projektit.

Tashmë, me vendim qeverie, aplikuesve që shpallen fitues me planet e tyre të biznesit, pas lidhjes së kontratës u paguhet paraprakisht 30% e masës së financimit të kontraktuar, kundrejt garancisë së parapagesës, të lëshuar nga shoqëri sigurimi dhe/ose banka, si dhe situacione pjesore të punimeve të kryera dhe/ose blerje të makinerive dhe pajisjeve, të vërtetuara kundrejt dokumentacionit përkatës.

Kjo lehtësi është bërë për disa kategori aplikuesish, si për mbjelljet e mollës, arrorëve, qershive, lajthive dhe gështenjave si dhe për instalimin e bankinave lundruese.

Nga kjo lehtësi përfitojnë gjithashtu kategoria që ka të bëjë me diversifikimin ekonomik në zonat rurale, pra investimet e ndryshme në agroturizëm dhe start-upet në këtë fushë.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.