Ndryshon koncesioni i Rinasit – Balluku: Ulet çmimi i biletave ajrore. Murrizi: S’po e bëni me paratë tuaja, por të qytetarëve
Ndryshimi i kontratës koncesionare për aeroportin e Rinasit do të sjellë ulje të çmimit të biletave ajrore si pasojë e uljes së tarifës së pasagjerit, linjave direkte për fluturime transoqeanike, si dhe liberalizimit të shërbimit të kohës dhe karburantit. Gjatë diskutimit të kontratës në seancën plenare, ministrja Belinda Balluku shpjegoi në detaje të gjitha parashikimet e reja, që synojnë rikthimin e ekuilibrit ekonomik të koncesionit.
Ndërkaq, deputeti Myslim Murrizi tha se ulja e çmimit të biletave është një lajm i mirë, por që mundësohet përmes parave të taksapaguesve shqiptarë.
Po ashtu, ai akuzoi qeverinë se në vitin 2013 premtoi se do të anulonte të gjithë koncesionet korruptive, por gjatë qeverisjes bëri të kundërtën.
Kontrata e koncesionit të aeroportit të Rinasit përfundonte në vitin 2022, por qeveria parashikoi një zgjatje 12-vjeçare, duke e lidhur me situatën e krijuar nga COVID-19 në industrinë e aviacionit e që sipas Erucontrol do të duhen 5-10 vjet për të rikthyer situatën normale.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.