Ndryshon për herë të pestë buxheti – 3.5 mld lekë për pensionistët, ulet fondi për pronarët, rritet për rindërtimin

Në prag të mbylljes së vitit, qeveria përmes një akti normativ, ka ndryshuar për herë të pestë buxhetin e shtetit. Referuar aktit normativ të botuar në Fletoren Zyrtare, treguesit kryesorë të buxhetit për këtë vit janë rishikuar me rritje. Kështu, të ardhurat planifikohen të mbyllen në 507.7 miliardë lekë, nga 484.1 miliardë që ishin parashikuar në buxhetin fillestar.

Shpenzimet po ashtu, regjistrohen në 628.2 miliardë lekë, me një rritje prej 34.5 miliardë lekë në krahasim me ligjin e buxhetit fillestar, ndërsa defiçiti parashikohet të shkojë në 120.5 miliardë lekë, nga 108.6 miliardë lekë,  me një rritje prej 11.9 miliardë lekë. Ndryshimet kanë reflektuar perfomancën ekonomike gjatë vitit, ku ka pasur rritje të ardhurave,  si dhe huanë e marrë në tregjet kombëtare.

Ndërkaq, akti i fundit normativ parashikon edhe bonusin e pensionistëve prej 3.5 miliardë lekësh, i cili do të shpërndahet nga 5 mijë lekë për çdo pensionist si shpërblim për festat e fundvitit.  Po ashtu, është ulur me 300 milionë leke buxheti i fondit për kompensimin e pronarëve në vlerë për vitin 2021, ndërsa fondi i rindërtimit është rritur në 35 miliardë lekë nga 28 miliardë që ishte parashikuar.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.