Në 2016, 10 mijë çështje për 57 përmbarues. Vasili: Këtë vit rritje me 60% të personelit
Shërbimi Përmbarimor Shtetëror zhvilloi sot analizën vjetore, ku mori pjesë edhe Ministri i Drejtësisë Petrit Vasili.
Duke vlerësuar shërbimet që ofron ky institucion, Vasili theksoi se një drejtësi e realizuar është një drejtësi në të cilën vendimi ekzekutohet. Ministri vlerësoi punën e kryer nga institucioni, pavarësisht ngarkesës së jashtëzakonshme.
“Shifra e trajtimit nga 57 përmbarues të afro 10 mijë çështjeve që arrin në 2016, ku mesatarja e dosjeve është gati 800 në vit, flet vetë për një ngarkesë të jashtëzakonshme, që quhet mbingarkesë, e cila do të çonte në paralizimin e institucionit, por e kundërta ka ndodhur; institucioni ka ecur dhe ka arritur rezultate të shumta”, tha Ministri Vasili.
Sipas Vasilit, treguesit pozitivë dhe rezultatet e arritura kanë imponuar qeverinë të rrisë personelin e këtij institucioni në masën 60%.
“Sa më shumë rritje e kapaciteteve me këtë konsolidim institucional që shërbimi ka marrë, aq më shumë çështje do të kenë mundësi të trajtohen, të ekzekutohen dhe të çohen deri në fund”, vlerësoi Vasili.
Ministri i Drejtësisë vlerësoi edhe skemën e re me të cilën funksionon institucioni, e cila garanton zbatimin e vendimeve gjyqësore.
“Tani struktura e re, pra tarifë bazë dhe pjesa tjetër është e lidhur me suksesin, e bën shumë të varur këtë çështje me rezultatin dhe rezultat do të thotë që qytetarët të kenë vendime të ekzekutuara”, u shpreh Ministri.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.