Në 2018 vlerësojmë spitalet sipas cilësisë, Manastirliu: Institucionet jopublike që nuk plotësojnë kushtet do të kyçen
Viti 2018 do të jetë viti cilësisë, sigurisë dhe akreditimit, ku çdo strukturë shëndetësore, nga spitalet universitare dhe deri tek qendrat shëndetësore, klinikat apo njësi të tjera të shërbimit shëndetësor, duhet të plotësojnë standardet bazë për akreditimin dhe licencimin e tyre. Ministrja e Shëndetësisë Ogerta Manastirliu deklaroi se institucionet spitalore jo publike që nuk plotësojnë kushtet do të mbyllen.
“Ka ardhur koha të flasim cilësi dhe siguri! Çdo shërbim që aksesohet nga qytetarët dhe ofrohet për pacientët kudo në sistemin publik dhe privat, do kërkohet të plotësojë standardet dhe të akreditohet. Viti 2018 do të jetë viti i cilësisë, sigurisë dhe akreditimit, ku do të rankojmë sipas niveleve të akreditimit të gjitha institucionet e kujdesit shëndetësor, që nga qendrat shëndetësore e deri të spitalet universitare për plotësimin e standardeve bazë, në shërbimin publik. Ndërsa përsa i takon strukturave shëndetësore jopublike, të cilat nuk i plotësojnë standardet bazë, bazuar në ligjin e kujdesit spitalor, aktiviteti i tyre do të pezullohet e më pas, do të mbyllet nëse nuk arrijnë të plotësojnë këto standarde”, u shpreh Ministrja Manastirliu në konferencën me temë “Përmirësimi i shërbimit spitalor nëpërmjet standardeve të akreditimit: Cilësi – Siguri -Eficencë”.
Janë 54 spitale publike dhe jopublike, 415 QSH publike, rreth 1900 pika ambulatore, 122 klinika private, 408 laboratorë private, 1416 klinika stomatologjike dhe rreth 1300 farmaci. Nga këto kemi vetëm 5 spitale të akredituara publik dhe jopublike, 1 qendër shëndetësore të akredituar. Ndërsa janë në proces akreditimi 48 qendra shëndetësore dhe 11 klinika private.
Standardet bazë që duhet të plotësojë çdo strukturë spitalore:
-Janë 258 standarde bazë që do të duhet të plotësojë çdo strukturë universitare për tu konsideruar e tillë dhe 233 standarde optimale për të garantuar cilësinë maksimale të shërbimit.
-Janë përcaktuar 186 standarde bazë spitalore dhe 294 standarde optimale, ndërsa sa i takon kujdesit parësor.
-Janë parashikuar 33 standarde bazë dhe 58 standarde optimale për ofrimin e shërbimit cilësor për pacientët.
“Me këtë proces, do të kemi një lidhje të integruar ndërmjet programit të licencimit dhe akreditimit, ku të gjitha institucionet shëndetësore që përfshihen në procesin e akreditimit, do të duhet të kenë përmbushur 100% standardet bazë për t’u licencuar. Por më e rëndësishmja, ne do të garantojmë cilësinë e shërbimit që do të marrë çdo qytetar, për më shumë siguri në shërbimin që merr dhe do të ketë mundësi të zgjedhë objektivisht në institucionin ku ai beson”, u shpreh Ministrja Manastirliu.
Programi i akreditimit do të kalojë në dy faza:
-Vlerësimi i institucioneve shëndetësore për plotësimin e standardeve bazë dhe më pas, vlerësimi i standardeve optimale të të gjitha atyre institucioneve që I kanë plotësuar 100% standardet bazë në fazën e parë mbikëqyrëse.
-Duke filluar nga Janari 2018 me standardet e reja do të nisë procesi i akreditimit për të gjitha spitalet. Në përfundim të këtij vlerësimi, brenda vitit 2018, do të listojmë spitalet sipas standardeve që ato do të plotësojnë.
-Rezultati do të jetë një proces më i efektshëm për strukturat e kujdesit shëndetësor, të cilat po kalojnë këtë proces, duke u lejuar atyre të përqendrohen në atë çfarë ata bëjnë më mirë – duke u shërbyer pacientëve të tyre.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.