Në Francë, varianti Delta përbën 20% të rasteve ndërsa Rusia regjistron rekord vdekjesh ditore. Brukseli thirrje 27 shteteve: ‘Koordinoni masat e udhëtimit’
Varianti Delta përfaqëson “rreth 20% të rasteve të reja të diagnostikuara në Francë”: ky është paralajmërimi i nisur këtë mëngjes nga Ministri Francez i Shëndetësisë, Olivier Véran, duke folur në radio France Info. Varianti Delta vazhdoi ai, “po bëhet progresivisht mbizotërues”. “Ai po përparon në krahasim me viruset e tjerë. Ne duhet të qëndrojmë shumë vigjilentë,” shtoi ai.
Numri i vdekjeve të lidhura me koronavirusin në Rusi është rritur me 652 në 24 orët e fundit nga 611 një ditë më parë, duke e çuar gjithsej në 134,545 vdekje. Qendra kombëtare e krizave të koronavirusit e bën të ditur këtë. Ky është numri më i lartë i vdekjeve të regjistruara në një ditë të vetme që nga fillimi i pandemisë. Shkalla e përkohshme e vdekshmërisë është 2.45% sipas Tass.
Zbatoni sa më shpejt të jetë e mundur, mundësisht deri më 1 korrik, rekomandimet e Këshillit të BE për të koordinuar masat kufizuese në lëvizjen e qytetarëve të shkaktuara nga pandemia dhe në certifikatën dixhitale të BE. Komisionerët europianë Didier Reynders, Thierry Breton dhe Stella Kyriakides e kërkuan këtë në një letër drejtuar 27 kryeqyteteve europiane. Në veçanti, Komisioni rekomandon garantimin e lirisë së lëvizjes së njerëzve që janë shëruar nga Covid ose kanë përfunduar ciklin e vaksinimit, të sigurojnë unitetin e familjes dhe të koordinojnë masat duke iu referuar hartave të zhvilluara nga Qendra Ecdc. (ANSA)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.