Në krizë Gjykata e Lartë – Shkarkohet Artan Zeneli, konfirmohen Kosova dhe Sevdari
Gjyqtari i Gjykatës së Lartë, Artan Zeneli është shkarkuar nga detyra, duke e lënë këtë organ me 6 anëtarë, nga 19 të përcaktuar me ligj. Ai nuk e ka justifikuar dot shtesën e pasurisë prej rreth 50 milionë lekësh gjatë 10 viteve të fundit. Zeneli nuk ka qene i pranishëm gjatë dhënies së vendimit. Mes pasurive binte në sy një vilë me vlerë 196 mijë euro në një zonë të njohur rezidenciale të Tiranës. Problem për Zenelin ishte edhe revokimi i vizës nga ana e Shteteve të Bashkuara të Amerikës.
Ndërkohë që fat tjetër kanë pasur dy magjistratet e tjera, Gjyqtarja e Apelit të Krimeve të Rënda Nertina Kosova dhe Prokurorja e Tiranës Antoneta Sevdari. Që të dyja i janë nënshtruar me përparësi procesit të rivlerësimit duke qenë se janë kandidate përkatësisht për Këshillin e Lartë Gjyqësor dhe Këshillin e Lartë të Prokurorisë. Ato u konfirmuan në detyre, duke kaluar kështu me sukses testin e Vetting-ut.
Gjyqtarja Nertina Kosova zotëron një apartament më sipërfaqe 120 metra katrorë në Tiranë, blerë në vitin 2006 përmes një kredie bankare prej 5 milionë lekësh. Asaj i është dashur të japë shpjegime për shtesën prej 1 milionë lekësh për blerjen e apartamentit, duke argumentuar se shuma në fjalë është siguruar nga kursimet familjare bashkë me prindërit.
Prokurores së Tiranës Antoneta Sevdari i është dashur të japë shpjegime mbi një sipërfaqe tokë arë prej 350 metra katrorë në Tiranë të përdorur për ndërtimin e një shtëpie të legalizuar në vitin 2013, si dhe për një apartamenti me sipërfaqe 101 metra katrorë me vlerë 97,500 euro. Sipas Komisionit të Pavarur të Kualifikimit, Sevdari i zotëron burimet e nevojshme financiare për të justifikuar këto dy prona.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.