Në krye të Europës – Bullgaria merr në janar presidencën e Bashkimit Europian
Nga 1 janari Bullgaria do të marrë Presidencën e Këshillit të Ministrave të Bashkimit Europian për një periudhë 6-mujore. Gjatë gjysmës së parë të vitit 2018, Bullgaria do të përpiqet të përmirësojë imazhin e saj si vendi më i varfër dhe më i korruptuar i bllokut. Kështu, Sofja synon t’i demonstrojë vendeve të tjera anëtare, se pas 10 vitesh në familjen europiane, ka ardhur koha për hyrjen edhe në zonën Shengen dhe afrimin në Eurozonë.
Jean-Claude Juncker, president i Komisionit Europian, ka deklaruar më parë se do të dëshironte hyrjen e Bullgarisë në euro dhe në regjimin e qarkullimit të lirë, por ka hasur në kundërshtimet e Gjermanisë dhe Francës. Këto dy vende janë të shqetësuara nga niveli i lartë i korrupsionit në vend.
Në këtë mënyrë qeveria e Sofjes duhet t’i bëjë ballë detyrës së vështirë për të sheshuar mosmarrëveshjet në këtë drejtim ndërmjet 28 vendeve anëtare dhe të punojë për një kompromis për çështjet e nxehta suç janë migracioni dhe Brexit.
Nisja zyrtare e Presidencës do të zhvillohet në Sofje më 11-12 janar. Deri në qershor janë në program rreth 300 evente, ndër të cilat takimi i krerëve të shteteve dhe qeverive të vendeve anëtare, por edhe një takim i kryeministrave të Ballkanit Perëndimor.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.