Në mbrojtje anëtarët dhe institucionet e vettingut! Vendimi: Gardistë për kryetarët, komisionerët, inspektorin e ILDKPKI dhe vëzhguesit e ONM
Anëtarët e institucioneve të vettingut dhe objektet ku ata do të ushtojnë veprimtarinë e tyre do të jenë në mbrojtje dhe në ruajtje nga Garda e Republikës.
Konkretisht qeveria ka miratuar vendimin për ruajtjen dhe mbrojtjen e anëtarëve të institucioneve të rivlerësimit kalimtar të gjyqtarëve dhe prokurorëve, të personelit vendas dhe ndërkombëtar, të objekteve ku ushtrojnë veprimtarinë, si dhe inspektorit të përgjithshëm të Inspektoratit të Lartë të Deklarimit dhe Kontrollit të Pasurive dhe Konfliktit të Interesave.
Në këtë vendim qeveria specifikon se Garda e Republikës së Shqipërisë do të ruajë dhe të mbrojë, me truprojë/shofer (nënoficer), si më poshtë vijon:
a) Kryetarin dhe komisionerët e Komisionit të Pavarur të Kualifikimit;
b) Kryetarin dhe gjyqtarët e Kolegjit të Posaçëm të Apelimit;
c) Komisionerët Publikë;
ç) Vëzhguesit ndërkombëtarë të emëruar nga Operacioni Ndërkombëtar i Monitorimit;
d) Inspektorin e Përgjithshëm të Inspektoratit të Lartë të Deklarimit dhe Kontrollit të Pasurive dhe Konfliktit të Interesave;
“Garda e Republikës së Shqipërisë do të ruajë dhe do të mbrojë objektet (mjediset e punës), ku ushtrojnë veprimtarinë Komisioni i Pavarur i Kualifikimit, Kolegji i Posaçëm i Apelimit, Komisionerët Publikë dhe vëzhguesit ndërkombëtarë të emëruar nga Operacioni Ndërkombëtar i Monitorimit”, thuhet në vendim, i cili ngarkon Ministrinë e Brendshme dhe Gardën e Republikës për zbatimin e tij.
os.de/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.