Në prag të ngritjes së SPAK – Ambasada e SHBA, video shpjeguese: Do hetojë të paprekshmit, zyrtarët e lartë
Në prag të krijimit të SPAK, Ambasada e Shteteve të Bashkuara në Tiranë ka publikuar një video ilustruese për të shpjeguar mënyrën si do funksionojë kjo strukturë dhe cili do të jetë misioni i saj. Sipas ambasadës, struktura e posaçme antikorrupsion do të hetojë të paprekshmit në vend, qofshin këta zyrtarë aktualë apo persona që kanë mbuluar dikur poste të larta në administratë.
SPAK- Struktura e Posaçme Anti-Korrupsion dhe Anti-Krim i organizuar, është një institucion i ri Kushtetues, detyra e të cilit është të hetojë dhe ndjekë penalisht korrupsionin, krimin e organizuar si dhe krimet e kryera nga zyrtarë të nivelit të lartë.
Në sistemin e vjetër gjyqësor, zyrtarët e nivelit të lartë të korruptuar dhe bosët e krimit të organizuar ishin të ‘Paprekshëm’ sepse gjyqtarët dhe prokurorët e korruptuar ose të kërcënuar nuk i nxirrnin përpara drejtësisë. Me anë të parave, lidhjeve, përkatësisë politike dhe kanosjeve. këta gjyqtarë dhe prokurorë ishin të prekshëm nga ndikimi politik dhe korrupsioni. Kjo e bënte të pamundur ndjekjen penale të korrupsionit. Çmimin e paguante i gjithë vendi.
Në video Ambasada Amerikane shpjegon edhe mënyrë si do funksionojë SPAK, ashtu si dhe si do veprohet që anëtarët e tij të mbahen larg nga korrupsioni.
“SPAK do të jetë një organ i pavarur, jo i politizuar, i cili do të hetojë dhe ndjekë të ‘paprekshmit’ e Shqipërisë. Këtu përfshihen zyrtarë të tanishëm dhe ish-zyrtarë të lartë. Anëtarët e SPAK emërohen nga Këshilli i Lartë i Prokurorisë, jo nga politikanët apo zyrtarët e Korruptuar. Po ashtu të gjithë anëtarët e SPAK do të duhet të Kalojnë Rivlerësimin (VETTING)”.
Prokurorët e Posaçëm do t’i nënshtrohen monitorimit të vazhdueshëm të financave dhe të telefonave të tyre për të parandaluar korruptimin apo kanosjen e tyre. Kjo bazohet në modele që janë përdorur edhe në vende të tjera si Kroacia apo Rumania.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.