“Në pritje” të forumit të biznesit Shqipëri – Ukrainë, synohet bashkëpunimi tregtar mes vendeve
Do të mbahet në Tiranë më datë 28 prill 2017, Forumi i Biznesit “Shqipëri – Ukrainë’’. Ky forum, i cilësuar si një event i rëndësishëm dhe i pari i këtij lloji mes dy vendeve, organizohet nën kujdesin e Qendrës së Eksporteve Shqiptare, “Albanian Food Industry”, Dhomës së Tregtisë dhe Industrisë së Doneskut, Ukrainë, si dhe me mbështetjen e Agjencisë Shqiptare të Zhvillimit të Investimeve (AIDA).
Sipas organizatorëve, nëpërmjet këtij aktiviteti synohet të forcohet bashkëpunimin tregtar ndërmjet dy vendeve, njëkohësisht bëhet e ditur se do të jenë të pranishëm përfaqësues nga qeveria e Ukrainës dhe Presidenti i Dhomës së Tregtisë Ukrainase.
“Pjesëmarrës në forum do të jenë një sërë kompanish të mirënjohura shqiptare dhe ukrainase nga sektorët e ushqimit, pijeve, produkteve të agrikulturës, turizmit, makinerive etj., të cilat kanë shprehur interesin e tyre për partneritet me kompanitë tona. Tregu ukrainas, i llogaritur në rreth 42 milionë banorë, është një treg potencial i rëndësishëm për prodhuesit shqiptarë”, thuhet në njoftimin e AIDA-s.
Gjatë forumit të biznesit “Shqipëri – Ukrainë’’ do të organizohen prezantime dhe diskutime mbi mundësitë e krijimit të një Marrëveshjeje të Përbashkët Tregtare (FTA), takime mes bizneseve të të dyja vendeve në formatin B2B, vizita në kompani të ndryshme në Shqipëri etj.
Panairi ndërkombëtar “NINGBO 2017”, 9-12 Qershor 2017, Kinë
AIDA ka njoftuar se sot është afati i fundit për regjistrimin e kompanive të interesuara për panairin “NINGBO 2017”, një nga më të rëndësishmit në kontinentin aziatik.
Panairi ndërkombëtar “NINGBO 2017” ofron një mundësi të shkëlqyer për partneritet midis bizneseve shqiptare dhe atyre ndërkombëtare, si dhe mundësi për gjetjen e tregjeve të reja për eksport. Për çdo shprehje interesi rreth pjesëmarrjes në këtë forum, lutemi të kontaktoni në: [email protected].
Osman Dedja/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.