“Në punë me vaksinë ose test PCR çdo 5 ditë” – Hyn në fuqi urdhri për administratën, qendrat tregtare dhe supermarketet

Prej datës 4 janar 2022 hyjnë në fuqi rregullat e reja për punonjësit e administratës publike, punonjësit e supermarketeve dhe të qendrave tregtare, në funksion të masave për frenimin e përhapjes së COVID-19. Sipas urdhrit, të miratuar në datën 23 dhjetor të vitit që sapo lamë pas  punonjësit e këtyre kategorive, të cilët nuk janë vaksinuar për COVID-19 do të duhet të paraqesin test PCR-je, çdo 5 ditë, për të verifikuar që nuk janë mbartës të infeksionit Sars-Cov-2.

Ndërkohë që të vaksinuarit, duhet të depozitojnë pranë qendrës së punës, certifikatë vaksinimi COVID-19, të lëshuar nga e-Albania, që vërteton vaksinimin e plotë, në formë digjitale apo të printuar. Sipas urdhrit, ata që kanë kaluar infeksionin mund të depozitojnë certifikatë shërimi COVID-19 të lëshuar nga e-Albania ose dokument të lëshuar nga autoritetet shëndetësore të vendit, që provon shërimin nga infeksioni Sars-Cov-2, me vlefshmëri deri në 6 muaj pas shërimit. Përjashtim nga rregullat e përcaktuara në këtë urdhër bëhet vetëm për rastet që kanë indikacion mjekësor të përcaktuar me dokument mjekësor për mosaplikimin e vaksinës.

Urdhri specifikon se punonjësit e administratës publike, punonjësit e supermarketeve dhe të qendrave tregtare, janë një ndër kategoritë që rrezikohen dhe përbëjnë rrezik për të tjerët, përhapjen e infeksionit. Megjithatë, pavarësisht detyrimeve në dokument nuk është specifikuar asnjë masë administrative që do të ndërmerret në rast se ky urdhër nuk zbatohet.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.