Në shitje 5% e “OTE – Tenderi më 15 mars, një ndër kushtet e kreditorëve për Greqinë
Fondi Helen i Privatizimit lajmëroi një tender ndërkombëtar për shitjen e 24.5 milionë aksione të zakonshme të gjigantit të telekomunikacionit OTE, që është ekuivalent me 5% të pronësisë së kompanisë. Agjencia e privatizimit pret që procesi i tenderit të përfundohet brenda një faze dhe caktoi afat deri në datën 15 Mars për investitorët e interesuar që të prezantojnë ofertat e tyre.
Kompania është e përfshirë në listën e privatizimeve të kërkuar nga kreditorët dhe është një nga firmat më të mëdha të telekomunikacionit në Greqi dhe në Europën Juglindore, me aksionet që tregtohen në Bursën e Athinës dhe të Londrës (LSE). Kompania, ish monopol kombëtar, manaxhohet nga firma gjermane Deutsche Telecom, që ka një zotërim prej 40%. Fondi Helen i Privatizimit zotëron 5%, ndërsa shteti grek mban 10% të pronësisë te kompania, që ka një vlerë tregu prej 5.7 miliardë euro dhe është e dyta më e madhe në vend pas Coca-Cola HBC.
Pjesa tjetër e pronësisë mbahet nga institucione vendase dhe ndërkombëtare si dhe nga investitorë privatë. Për shitje është lajmëruar pjesa e aksioneve që mbahet nga fondi i privatizimit. Kompania operon kryesisht në tregun grek, por ofron gjithashtu shërbime edhe në Rumani e Shqipëri. Greqia ka gjeneruar thuajse 4.7 miliardë euro nga privatizimet që kur nënshkroi programin e parë të shpëtimit në vitin 2010 dhe synon 3 miliardë të tjera deri në 2019-ën, apo 1 vit pas përfundimit të programit të fundit të shpëtimit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.