Në shitje pronat publike – Ndizet drita jeshile e privatizimit të pasurive shtetërore të dhëna me qira 1 euro
Pasuritë shtetërore të dhëna në formën e qirasë 1 euro do të mund të privatizohen nga përdoruesit aktualë.
Përmes disa ndryshimeve në Vendimin për Kriteret e Vlerësimit të Pronës Shtetërore që Privatizohet apo Transformohet dhe Procedurat e Shitjes, këshilli i Ministrave i ka hapur dritën jeshile kalimit të pronësisë së këtyre pasurive në favor të subjekteve që aktualisht i kanë në përdorim. Pasuritë shtetërore, të dhëna me kontratë qiraje ose enfiteozë, me sipërfaqe mbi 500 m2 i shiten në mënyrë të drejtpërdrejtë kontraktuesit nga Drejtoria e Drejtimit të Pronës Publike. Privatizimi mund të kryhet edhe nëse subjekti ka konsumuar 5 vite nga kontrata dhe në rast se vlera e investimit të kryer prej tij është mbi 150 për qind të vlerës së truallit.
Por edhe nëse përmbush kushtin e pesë viteve, përsëri mundësia e privatizimit është e hapur, në rast se vlera e investimit të kryer prej tij është mbi 750 për qind të vlerës së truallit; dhe nëse nga ana e kontraktuesit janë respektuar kushtet e tjera të kontratës dhe ai nuk ka detyrime ndaj shtetit. Privatizimi bëhet edhe më i lehtë për të gjitha llojet e kontratave 1 euro, qofshin ato objekt, truall nen objekt, truall funksional, linja teknologjike, makineri, apo pajisje.
Privatizimi i tyre mund të kryhet në “çdo kohë, nëse kontrata është e vlefshme dhe brenda afatit të përcaktuar në kontratë, në rast se vlera e investimit të kryer prej tij është mbi 750 për qind e vlerës së truallit; nga ana e kontraktuesit janë respektuar kushtet e tjera të kontratës dhe ai nuk ka detyrime ndaj shtetit.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.