Në Shkodër qindra hektarë tokë të përmbytura – Ditët në vijim më kritike për shkak të prurjeve

Shkrirja e borës si pasojë e rritjes së temperaturave dhe reshjet e shiut që kanë shoqëruar ditët e fundit kanë bërë që një pjesë e madhe e territorit të Bashkisë së Shkodrës të jetë e përmbytur. Një efekt negativ kanë dhënë edhe shkarkimet e detyruara të hidrocentraleve në kaskadën e lumit Drin, si pasojë e shtimit të prurjeve.

Gjendja paraqitet veçanërisht problematike në njësinë administrative Ana e Malit, ku janë të përmbytura 750 hektarë tokë, me fshatrat më të prekur ato Muriqan, Oblikë dhe Obot.

Nga sipërfaqja e mësipërme, rreth 550 ha janë tokë e mbjellë me kultura bujqësore, kryesisht jonxhe dhe foragjere, por edhe bimë dekorative, grurë, sera, ullishte dhe vreshta. Kjo pritet të sjellë pasoja të rënda për ekonominë e fermerëve në këtë zonë.

Rreth 50 hektarë nën ujë raportohen edhe në NJA Dajç, ku sërish ka një raport të madh të tokës së mbjellë të përmbytur.

Sipas IGJEUM-it, rezulton se lumenjtë do të kenë prurje të larta kryesisht në pjesën veriore të territorit. Baseni Drin-Buna dhe Liqeni i Shkodrës kanë patur tendencë për rritje të prurjeve dhe niveleve. Në vazhdim përgjatë datave 7 dhe 8 Mars 2018 rritja e prurjeve dhe e niveleve në pjesën e Lumit Buna dhe Liqenit të Shkodrës do të jetë më e ndjeshme.
Në këtë mënyrë, rritet rreziku i zgjerimit të hartës së përmbytjeve në zonën e Nën-Shkodrës. Nivelet më të larta janë llogaritur të arrihen në datën 8 Mars 2018.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.