Në sitë 1,417 zyrtarë të lartë – ILDKPKI: 115 nëpunës janë kallzuar në prokurori, 54 gjoba për refuzim deklarimi apo pasaktësi
Për vitin 2019, ILDKPKI ka bërë 115 raste kallëzime penale dhe referime të tjera në drejtim të zyrtarëve publikë ndërkohë që ka vendosur 54 gjoba për mospërmbushjen e detyrimeve ligjore për deklarimin e pasurisë. Scan Televizion disponon raportin vjetor të punës së Inspektorati i Lartë i Deklarimit dhe Kontrollit të Pasurive dhe Konfliktit të Interesave, sipas të cilit janë administruar gjatë vitit 2019 3.868 deklarata të interesave privatë. Ndër to, ILDKPKI ka kaluar në kontroll të plotë në total 1,417 subjekte deklarues, si për shkak funksioni, ashtu edhe bazuar në informacione të ardhura nga denoncimet në numrin e institucionit, postën zyrtare dhe elektronike, apo në median e shkruar, audio-vizive.
Institucioni ka aplikuar masën administrative “gjobë”, për rastet e refuzimeve për deklarim, si dhe për rastet e mosdeklarimeve dhe/apo për çështje të konfliktit të interesave. Të ndëshkuar me masa administrative, “gjobë”, për periudhën deri më 31.12.2019 janë në total 54 zyrtarë. Ndërkaq, për periudhën 2014 – 2019 janë sanksionuar me masë administrative “gjobë” në total rreth 1.726 zyrtarë.
Po ashtu, Inspektorati i Lartë, gjatë periudhës 2014 – 2019, ka referuar pranë Institucionit të Prokurorisë, strukturave të hetimit tatimor, Drejtorisë së Përgjithshme të Parandalimit të Pastrimit të Parave, si dhe Policisë së Shtetit, 430 subjekte, në të cilët janë përfshirë zyrtarë të nivelit të lartë drejtues, si Deputetë të Kuvendit të Republikës së Shqipërisë, Kryetarë Bashkie, Drejtorë Drejtorie etj. Për periudhën raportuese janë paraqitur në total 115 raste kallëzime penale dhe referime të tjera.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.